जमीनमालक गोत्यात : निबंधक, तलाठी, सर्कल अधिकारी यांच्या विरुद्ध तक्रार

सातबारा कोरा करून जमिनीची विक्री

नाशिक : एकदा जमिनीचे साठेखत व नोंदणीकृत खरेदीखत होऊन सातबारा उताऱ्यावर त्याची नोंद झालेली असताना सातबारा कोरा करून तलाठी व मंडळ अधिकाऱ्यांनी जमीन मालकाशी संगनमत करून परस्पर तिची विक्री केल्याचे उघडकीस आले आहे. विशेष म्हणजे ज्या जमिनीच्या खरेदीखताचा व्यवहार दुय्यम निबंधक कार्यालयात यापूर्वीच नोंदविला गेला त्या कार्यालयाने पुन्हा एकवार त्याच जमिनीच्या विक्रीची नोंद करून आपल्या गलथानपणाचे प्रदर्शन घडवून दुष्कृत्यात सहभागी झाले आहे. यासंदर्भात संबंधितांविरुद्ध गुन्हा दाखल करण्याबरोबरच, जमिनीची पुनर्खरेदी करणाऱ्यांविरुद्धही तक्रार दाखल करण्यात आली आहे.
त्र्यंबकेश्वर तालुक्यातील झारवड येथील गट नंबर ७ मधील हा प्रकार दोन दिवसांपूर्वीच उघडकीस आला आहे. सोमा रामा हळकुंडे या नावसाध्यर्म्याचा फायदा घेत लहानू सोमा हळकुंडे यांनी सदरची जागा चुकीच्या पद्धतीने आपल्या नावावर करून घेतल्यानंतर विष्णू फाळके यांना परस्पर विक्री केल्याची बाब सोमा रामा हळकुंडे यांना समजताच त्यांनी उपविभागीय अधिकाऱ्यांकडे धाव घेतली होती. त्यावर सुनावणी होऊन सदरची जागा सोमा रामा हळकुंडे यांची असल्याचा निकाल देण्यात आला. त्यानंतर सोमा हळकुंडे यांनी सदरची जागा ६० लाख रुपयांना सुरेश पांडुरंग नागरे यांना साठेखत व नोंदणीकृत खरेदीखताने विक्री केली. दरम्यान, या जागेचा वाद इगतपुरी न्यायालयात व अपर आयुक्तांपर्यंत पोहोचल्याने जमिनीच्या खरेदी-विक्रीबाबत जैसे थे ठेवण्याचा आदेश दोन्ही न्यायाधिकरणाने दिला होता. त्यानुसार सुरेश नागरे यांचे नाव सातबारा उताऱ्यावर इतर हक्कात लागून तशी नोंदही नमुना ६ ड मध्येही तत्कालीन तलाठी व मंडळ अधिकाऱ्याने घेतली. परंतु वर्ष उलटत नाही तोच, तलाठी, मंडळ अधिकाऱ्यांनी जमीन मालकाशी संगनमत करून, सातबारा उताऱ्यावरील सर्व नोंदी रद्द करून एकदा विक्री झालेल्या जमिनीची पुन्हा विक्री केली. विशेष म्हणजे सोमा हळकुंडे व सुरेश नागरे यांच्यात झालेल्या नोंदणीकृत खरेदी व्यवहारात या पुढे जैसे थे ठेवण्याचा आदेश न्यायालयाने दिलेला असताना, तो झुगारून सोमा हळकुंडे यांनी गणेश आडके, लोकेश नागरे, जगदीश राठी व तुकाराम पेखळे यांना विक्री केली.