लग्नसोहळ्यातून मौल्यवान वस्तू चाेरीला जाण्याच्या घटना नाशिककरांना नवीन नाहीत. मात्र, एका बड्या राजकीय व्यक्तीच्या लग्न सोहळ्यात पोहोचल्यानंतर जिल्हाधिकारी मांढरे यांना त्यांचे पाकीट खिशात नसल्याचे लक्षात आले आणि सुरक्षारक्षक व पोलीस यंत्रणाही चक्रावून गेली. मांढरे यांचे पाकीट त्यांच्याकडून नेमके कोठे गहाळ झाले की, कोणी चोरट्याने ते त्यांची नजर चुकवून चोरी केले, याविषयी साशंकता कायम आहे. मात्र, शहरात याबाबत रात्री उशिरापर्यंत चर्चा रंगली होती. जिल्हाधिकाऱ्यांचे पाकीट हरवले अन‌् कोणाला नाही सापडले, अशीच अवस्था झाल्याने आश्चर्य व्यक्त होत होते.
रविवारी राज्याचे उपमुख्यमंत्री अजित पवार, जिल्ह्याचे पालकमंत्री छगन भुजबळ, खासदार संभाजीराजे भोसले यांसारखे मान्यवर नाशिक शहराच्या दौऱ्यावर आले होते. पवार यांनी शासकीय अधिकारी वर्गासोबत गंगापूर धरणालगत असलेल्या ‘ग्रेप पार्क रिसॉर्ट’ येथे आढावा बैठकही बोलाविली होती. या बैठकीला पोलीस महानिरीक्षक डॉ.प्रताप दिघावकर, विभागीय आयुक्त राधाकृष्ण गमे, जिल्हाधिकारी सूरज मांढरे, पोलीस आयुक्त दीपक पाण्डेय, जिल्हा परिषदेच्या मुख्य कार्यकारी अधिकारी लीना बनसोड यांच्यासह सर्वच वरिष्ठ अधिकारीही उपस्थित होते. बैठक आटोपून अजित पवार, छगन भुजबळ यांच्यासह सर्वच वरिष्ठ शासकीय अधिकारी गंगापूर रोडवरील एका लॉन्समध्ये आयोजित लोकप्रतिनिधींच्या कुटुंबातील लग्नसोहळ्याला हजर राहिले. यावेळी नववधु-वराला आशीर्वाद अन‌् शुभेच्छा दिल्यानंतर, मांढरे यांनी आपला खिसा तपासला असता, त्यांना पाकीट नसल्याचे लक्षात आले. यामुळे पाकीट नेमके गेले कोठे? असा प्रश्न त्यांना पडला. यानंतर, शोधाशोधही झाली. मात्र, पाकीट काही कुणाला सापडले नाही.
दरम्यान, मांढरे यांच्याशी या प्रकरणी संपर्क साधला असता, त्यांनी मी आज अनेक ठिकाणी गेलो होतो, त्यामुळे पाकीट नेमके कोठे गहाळ झाले, याबाबत निश्चितपणे सांगता येणार नाही, असे सांगितले.