नाशिक : सिडकोच्या कारगिल चौकातील आशीर्वाद अपार्टमेंटमधील पाच नंबरच्या फ्लॅटमध्ये पलंगावर बेशुद्ध तसेच गळ्यात बुटाची लेस गुंडाळलेल्या अवस्थेत आढळून आलेले प्रकाश गुलाब अहिरे (४८) यांचा गळा आवळून खून केल्याचे शवविच्छेदन अहवालानंतर समोर आले आहे़ सुमारे २० दिवसांपूर्वी प्रकाश अहिरे हे घरातील पलंगावर बेशुद्धावस्थेत आढळून आले होते़ या प्रकरणी अंबड पोलिसांनी अज्ञात इसमाविरोधात खुनाचा गुन्हा दाखल केला आहे़
पोलिसांनी दिलेल्या माहितीनुसार ९ डिसेंबर २०१८ रोजी रात्री पावणेनऊ वाजेच्या सुमारास प्रकाश अहिरे हे घरातील पलंगावर बेशुद्ध तसेच गळ्यात बुटाची लेस गुंडाळलेल्या अवस्थेत आढळून आले होते़ त्यांना शालक विशाल मोरे यांनी जिल्हा रुग्णालयात उपचारासाठी दाखल केले असता डॉ़ राहुल पाटील यांनी तपासून मयत घोषित केले होते़ जिल्हा शासकीय रुग्णालयात प्रकाश अहिरे यांचे शवविच्छेदन करण्यात आले असता फोरेन्सिक एक्स्पर्ट डॉ. आनंद पवार यांनी प्रकाश अहिरे यांचा कोणी तरी गळा दाबून, तसेच मारहाण करून खून केल्याचे शवविच्छेदन अहवालात नमूद केले. याबाबत अंबड पोलीस ठाण्यात प्रथमदर्शनी अकस्मात मृत्यूची नोंद करण्यात आली होती़
दरम्यान, या घटनेचा शवविच्छेदन अहवाल प्राप्त झाल्यानंतर अंबड पोलिसांनी खुनाचा गुन्हा दाखल केला असून मयत अहिरे यांचे कुटुंबीय व नातलगांकडे प्राथमिक तपास केला असून, त्यातून काहीही निष्पन्न झालेले नाही़ तसेच अहिरे यांच्या नातेवाइकांनीही कोणावर संशय व्यक्त न केल्याने या खुनाचा उलगडा करण्याचे आव्हान अंबड पोलिसांपुढे आहे.