ठळक मुद्देतीन प्रवासी जखमी
लोहोणेर : सटाणा - देवळा रस्त्यावर असलेल्या तुर्की हुडीजवळ पिकअप् आणि मोटरसायकल यांच्यात झालेल्या भीषण अपघातात एका दाम्पत्याचा जागीच मृत्यू झाल्याची घटना बुधवारी (दि. ६) घडली. या घटनेत अपघात टाळण्याच्या प्रयत्नात टेम्पो उलटल्याने तीन प्रवासी जखमी झाले.
संतोष गांगुर्डे आणि आशा गांगुर्डे अशी मृतांची नावे असून, ते दोघेही मूळचे चांदवड तालुक्यातील रहिवासी असून, सध्या ते देवळा तालुक्यातील वाज गावात वास्तव्यास होते.
सटाण्याकडून देवळ्याच्या दिशेने फरशी घेऊन जाणारी पिकअप् आणि मोटरसायकल यांच्यात हा अपघात झाला. ही धडक एवढी भीषण होती की, त्यात मोटरसायकलवरील पती-पत्नीचा जागीच मृत्यू झाला.
घटनेची माहिती मिळताच सटाणा पोलिसांनी घटनास्थळी धाव घेत पिकअप् वाहन बाजूला करत वाहतूक सुरळीत केली. जखमींना पुढील उपचारासाठी मालेगावी हलविण्यात आले आहे.