मनपा निवडणुकांसाठी आपची मोर्चेबांधणी

नाशिक : आम आदमी पार्टीने इतर राजकीय पक्षांपेक्षा वेगळ्या मार्गाने राजकारणाचा मार्ग निवडणला असून आवाक्याबाहेरील पोकळ आश्वासने न देता जनतेच्या दैनंदिन जीवनातील शिक्षण, पाणी, आरोग्य यासारख्या मूलभूत सुविधा सुधारण्यावर भर देऊन दिल्लीच्या माध्यमातून जनतेसमोर उदाहण ठेवले आहे. त्याचप्रकारचे काम नाशिकसह राज्यातील अन्य स्थानिक स्वराज्य संस्थांमध्येही शक्य असून त्यासाठी आम आदमी पार्टीने नाशिक महापालिकेसह राज्यातील सर्व स्थानिक स्वराज्य संस्थांच्या निवडणुका लढविण्याचा निर्णय घेतल्याची माहिती ‘आप’चे राज्य अध्यक्ष रंगा राचुरे, उपाध्यक्ष किशोर मंध्यान, संघटनमंत्री विजय कुंभार, सचीव धनंजय शिदे आदींनी पत्रकार परिषदेच्या माध्यमातून दिली.

आम आदमी पार्टीच्या राज्य कमिटीने आगामी मनपा निवडणुकीच्या पार्श्वभूमीवर नाशिक शहरातील पक्षाच्या स्थितीचा आढावा घेतल्यानंतर गुरुवारी पत्रकार परिषद घेत आप आगामी निवडणूक लढविणार असल्याचे स्पष्ट केले. आम आदमी पक्षाला गेल्या दोन पंचवार्षिकमध्ये विशेष प्रयत्न न करताही मतदारांचा प्रतिसाद मिळत असल्याचे दिसून आले. त्यामुळे पक्ष या निवडणुकांमध्ये संपूर्ण ताकद लावणार असल्याचे त्यांनी यावेळी सांगितले. सद्य:स्थितीत स्थानिक स्वराज्य संस्थांमध्ये विकासाच्या कामांसाठी ५० ते ७५ टक्के अतिरिक्त खर्च होत असून नाशिकमध्येही हीच परिस्थिती असल्याचा आरोप ‘आप’च्या पदाधिकाऱ्यानी केला. या खर्चात बचत करून नागरिकांना अल्पदरात उत्तम सेवा देणे शक्य असल्याचा दावाही यावेळी करण्यात आला. दरम्यान, आगामी निवडणुकांच्या पार्श्वभूमीवर पक्षाच्या कार्यध्यक्षपदाची धुरा जितेंद्र भावे यांच्याकडे सोपविण्यात आली असून त्यांच्याच नेतृत्वात आगामी मनपा निवडणूक लढविण्यात येणार असल्याचे राज्य कमिटीच्या पदाधिकाऱ्यांनी स्पष्ट केले आहे.