लाचखोर सहायक उपनिरीक्षकाला शिक्षा

सक्तमजुरी : तीन हजारांची घेतली लाच

 नाशिक : अपघाताचा गुन्हा दाखल न करणे, तसेच पंचनाम्याच्या प्रतीसाठी तीन हजार रुपयांची लाच घेताना रंगेहाथ पकडण्यात आलेले अंबड पोलीस ठाण्याचे तत्कालीन सहायक पोलीस उपनिरीक्षक नरेंद्र दामू वळवी यांना जिल्हा व सत्र न्यायाधीश एऩ के.ब्रह्मे यांनी दोन वर्षे सक्तमजुरी व तीन हजार रुपये दंडाची शिक्षा सुनावली़
या खटल्याबाबत अधिक माहिती अशी की, तक्रारदार २७ आॅगस्ट २०१० रोजी रात्रीच्या सुमारास घोटीहून नाशिककडे वाहनाने येत होते़ पांडवलेणीजवळून शहराकडे येत असताना समोरून आलेल्या लक्झरी बसच्या लाइटमुळे रस्त्याचा अंदाज न आल्याने त्यांचे वाहन एका झाडावर जाऊन आदळले़ या अपघाताची अंबड पोलीस ठाण्यात नोंद करण्यासाठी तक्रारदार गेले असता तेथील तत्कालीन सहायक पोलीस उपनिरीक्षक नरेंद्र वळवी यांनी गुन्हा दाखल करणे व घटनास्थळ पंचनाम्याच्या प्रतीसाठी तीन हजार रुपयांची मागणी केली़
तक्रारदाराने याबाबत लाचलुचपत प्रतिबंधक विभागाकडे तक्रार केल्यानंतर लाचलुचपत प्रतिबंधक विभागाचे पोलीस उपअधीक्षक अनंत तारगे यांनी सापळा रचून वळवी यास तक्रारदाराकडून तीन हजार रुपयांची लाच घेताना रंगेहाथ पकडले़ हा खटला नाशिकच्या जिल्हा न्यायालयात सुरू होता़ यामध्ये जिल्हा सरकारी वकील राजेंद्र घुमरे यांनी पाच साक्षीदार तपासून वळवींवरील आरोप सिद्ध केले़ न्यायालयाने आरोपी नरेंद्र दामू वळवी यास भ्रष्टाचार प्रतिबंधक कायदा कलम ७ नुसार एक वर्ष सक्तमजुरी व तीन हजार रुपये दंड, दंड न भरल्यास दोन महिने साधी कैद, तर कलम १३ अन्वये २ वर्षे सक्तमजुरी व तीन हजार रुपये दंड, दंड न भरल्यास दोन महिने साधी कैदेची शिक्षा सुनावली़ (प्रतिनिधी)