भुजबळ फार्म, ‘चंद्राई’चे मूल्यांकन सुरूच

सलग दुसरा दिवस : तपासी प्रक्रिया आठवडाभर चालणार

नाशिक : बेहिशेबी मालमत्ता असल्याप्रकरणी अटकेत असलेले राज्याचे माजी सार्वजनिक बांधकाममंत्री छगन भुजबळ यांच्या भुजबळ फार्म व निवासस्थानांच्या परिसराच्या एकूण क्षेत्रफळाची मंगळवारी (दि. २३) दुसऱ्या दिवशीही मुंबईच्या लाचलुचपत प्रतिबंधक विभागाच्या पथकाने सार्वजनिक बांधकाम विभागाच्या अधिकाऱ्यांची मदत घेत भुजबळांच्या ‘चंद्राई’ बंगल्याच्या मूल्यांकनाची प्रक्रिया राबविली. विविधअंगी मूल्यांकनाची प्रक्रिया किमान आठवडाभर चालणार असल्याचे समजते.
ज्ञात उत्पन्न स्रोतांपेक्षा अधिक मालमत्ता आढळून आल्यामुळे मालमत्तेचे मूल्यांकन करण्याचे आदेश लाचलुचपत प्रतिबंधक विभागाला प्राप्त झाले आहेत. या आदेशानुसार सोमवारपासून (दि.२२) सिडको येथील भुजबळ फार्म व येथील जुन्या-नव्या बंगल्यांचे क्षेत्र आणि तेथील विविध वस्तूंचे मूल्यांकन सुरू करण्यात आले आहे. लाचलुचपत प्रतिबंधक विभागाने मूल्यांकनाची कार्यवाही पूर्ण करण्यासाठी सार्वजनिक बांधकाम विभागाच्या अधिकाऱ्यांचीही मदत घेतली आहे. दाखल गुन्ह्णाच्या तपासाचा
एक भाग म्हणून मूल्यांकनाची प्रक्रिया राबविली जात असल्याची माहिती भुजबळ यांचे वकील अ‍ॅड. जालिंदर ताडगे यांनी सांगितले.
महाराष्ट्र सदन, इंडिया बुल्स आदि प्रकरणांत काळा पैसा प्रतिबंधक कायद्यान्वये दाखल असलेल्या तीन गुन्ह्णांप्रकरणी राज्याचे माजी सार्वजनिक बांधकाममंत्री छगन भुजबळ यांना सक्तवसुली महासंचालनालयाकडून (ईडी) अटक करण्यात आली आहे. भुजबळ यांची सखोल चौकशी केल्यानंतर भारतीय दंड विधान १९/१ काळापैसा प्रतिबंधक कायद्यांतर्गत ते अटकेत आहे.
मंगळवारी सकाळी साडेअकराच्या सुमारास मुंबईच्या लाचलुचपत प्रतिबंधक विभागाचे व सार्वजनिक बांधकाम विभागाच्या अधिकाऱ्यांचे पथक भुजबळ फार्मवर पोहोचले. तब्बल दोन ते अडीच तास भुजबळ यांच्या मालमत्तेचे मूल्यांकन सुरू होते. यावेळी प्रवेशद्वार बंद करून घेण्यात आले होते. केवळ काही देखरेख करणारे कर्मचारी यांच्या उपस्थितीत ही कारवाई करण्यात आली.

अचूक किंमत शोधण्याचा निश्चय
गोविंदनगर भागातील आलिशान ‘भुजबळ फार्म’च्या शंभर कोटींचे कथित मूल्यांकन असलेल्या मालमत्तेची अचूक किंमत शोधून काढण्याचा निश्चय लाचलुचपत प्रतिबंधक विभागाने घेतला आहे. त्यानुसार सार्वजनिक बांधकाम विभागाच्या अधिकाऱ्यांची मदत घेत सोमवारपासूनच लाचलुचपत प्रतिबंधक विभागाने भुजबळांच्या फार्मचा ताबा घेतला आहे. मंगळवारीही तीन तास फार्म परिसराच्या क्षेत्रफळासह संपूर्ण गृहसजावटींच्या वस्तूंपासून तर लाकडी फर्निचरची तपासणी करण्यात करण्यात येत आहे. बांधकाम रचना पडताळून बघण्यासाठी काही वास्तुविशारदांचीही मदत लाचलुचपत प्रतिबंधक विभागाच्या अधिकाऱ्यांनी घेतल्याचे सूत्रांकडून समजते.

दगड, माती, लाकूड, झुडूपांची तपासणी
प्रत्यक्षात दाखविलेल्या भुजबळांच्या महालाची किंमत आणि प्रत्यक्षात बाजारमुल्या यामध्ये मोठी तफावत असल्याचे सुत्रांकडून समजते. भुजबळांनी महाल उभारण्यासाठी वापरलेला आगळावेगळा दगड, माती, लाकूड आणि सजावटीसाठी लावलेले परदेशी प्रजातीचे महागडे झुडूप अशा सर्वच बाबींचे मुल्यांकन सध्या दोन दिवसांपासून सुरू आहे. आलिशाान महाल व तेथील इंटेरिअर आणि विविध वस्तू परदेशांमधून आणल्याचा लाचलुचपत प्रतिबंधक विभागाच्या पथकाला संशय असल्याने इलेक्ट्रिक, कृषी, वास्तुविशारद आदि क्षेत्रांमधील तज्ज्ञांना पाचारण करुन मोजदाद केली जात आहे. मातीपासून मफलरपर्यंत सर्वच बाबींची ‘किंमत’ अधिकाऱ्यांकडून ठरविली जात आहे.
विद्युत व्यवस्थेचीही पडताळणीइलेक्ट्रिकल क्षेत्राच्या तज्ज्ञांना पाचारण करून मंगळवारी भुजबळ फार्म, चंद्राई बंगल्यामध्ये करण्यात आलेल्या आकर्षक विद्युत व्यवस्था पडताळण्यात आली. यावेळी भुजबळांनी ‘प्रकाश’ पाडण्यासाठी वापरलेल्या विविध महागड्या दिव्यांपासून तर आवार सुशोभित करण्यासाठी लॉन्स व महागडे परदेशी रोपट्यांपर्यंत फेरमूल्यांकन लाचलुचपत प्रतिबंधक विभाग करत आहे.