लसीकरण करणाऱ्या आरोग्य कर्मचाऱ्यास मारहाण

शुक्रवारी दुपारी हा प्रकार पास्ते गावात घडला. पंतप्रधान नरेंद्र मोदी यांच्या वाढदिवसानिमित्त अधिकाधिक लसीकरण करण्यात यावे अशा सूचना आरोग्य विभागाने दिल्यामुळे सिन्नर तालुका आरोग्य विभागाच्या वतीने गावोगावी लसीकरण मोहीम हाती घेण्यात आली होती. पास्ते येथे लसीकरणासाठी आरोग्य कर्मचाऱ्यांकडून आवाहन केले जात असताना, एका इसमाने आरोग्य कर्मचारी सूर्यवंशी यांच्याशी वाद घातला व त्यातून मारहाण करण्यास सुरुवात केली. हा प्रकार पाहून आरोग्य सेविकांनी त्याची समजूत काढण्याचा प्रयत्न चालविला असता, त्यांनाही धक्काबुक्की करण्यात आली. या प्रकारानंतर मात्र पास्ते येथील लसीकरण बंद करण्यात आले. या घटनेचा सिन्नर तालुका जिल्हा परिषद आरोग्य कर्मचारी संघटनेचे तीव्र निषेध केला असून, आजवर एका लसीकरण सत्रात जास्तीत जास्त शंभर लाभार्थी लसीकरण करावे असा शासनाचा नियम आहे. तरीदेखील काळाचे भान लक्षात घेता आमचे आरोग्य कर्मचारी तीनशे ते साडेतीनशे नागरिकांचे लसीकरण करत आहेत. यामागे नागरिकांचा जीव वाचविण्याचा हेतू असून, असे असतानाही आरोग्य कर्मचाऱ्यांना मारहाणीच्या कटू प्रसंगाला सामोरे जावे लागत असल्याने त्याच्या निषेधार्थ संबंधितांना अटक होऊन त्यांच्यावर कारवाई होईपर्यंत सिन्नर तालुक्यातील कोविड लसीकरण मोहीम थांबविण्याचा निर्णय कर्मचारी संघटनेने जाहीर केला आहे.