सेना, भाजपाचे इच्छुक लागले कामाला

नाशिकरोड : कॉँग्रेस, राष्ट्रवादी, मनसेमधील इच्छुक अद्याप शांतच

 नाशिकरोड : मनपा निवडणुकीच्या पार्श्वभूमीवर प्रत्येक प्रभागात शिवसेनेचे सर्व इच्छुक एकत्रितरीत्या घरोघरी जाऊन मतदारांच्या भेटी घेत आहेत, तर भाजपाचे इच्छुक वैयक्तिकरीत्या भेटीगाठी घेत आहेत. मात्र कॉँग्रेस - राष्ट्रवादी, मनसे आदि पक्षांच्या इच्छुकांनी अद्यापपर्यंत प्रचारात पाहिजे तसा रस दाखविल्याचे चित्र दिसत नाही.
केंद्रात व राज्यात सत्ता बदल झाल्यानंतर कॉँग्रेस-राष्ट्रवादी आघाडीचे नेते, पदाधिकारी, कार्यकर्ते कोमात गेल्यासारख्या परिस्थितीत आहे. सतत सत्तेत राहणाऱ्या आघाडीचे नेते, कार्यकर्ते सत्ता गेल्यामुळे सुस्तावून गेल्यासारखे झाले आहे, तर गेल्या पंचवार्षिकच्या प्रारंभी अत्यंत फॉर्मात असलेल्या मनसेलादेखील गेल्या दोन वर्षांपासून विविध कारणामुळे व अंतर्गत राजकारणामुळे घरघर लागली आहे. तर मोदींच्या करिष्म्यामुळे मवाळ असलेल्या भाजपाला भीमासारखी ताकद आली असून, राजकारणात अत्यंत सुगीचे दिवस आले आहे, तर शिवसेना आपल्या स्वभावाप्रमाणेच मार्गक्रमण करत आहे. आघाडीला आलेली मरगळ व मनसेची होत असलेली राजकीय वाताहात यामुळे शिवसेना-भाजपामध्ये दाखल होणाऱ्यांची गर्दी झाली आहे.
दोन्ही पक्षांकडे इतर पक्षांतून येणाऱ्यांची संख्या मोठी असल्याने प्राप्त राजकीय परिस्थिती व गणितानुसार काही जणांना पक्ष प्रवेशासाठी तूर्त थांबण्याचा इशारा व सल्ला दिला जात आहे. त्यामुळे संबंधितांना पुन्हा आहे त्या पक्षातच थांबावे लागत आहे. (प्रतिनिधी)