सुप्रिया सुळेंकडून अजित पवारांची पाठराखण

सुप्रिया सुळेंकडून अजित पवारांची पाठराखण

नाशिक : मुख्यमंत्रिपद तुम्हाला की अजितदादांना, या प्रश्नावर, ‘मला भाऊ महत्त्वाचा आहे. मुख्यमंत्रिपदावरून आमच्या घरात भांडण लावण्याचा प्रयत्न केला जातोय. मात्र मला मुख्यमंत्रिपदापेक्षा माझा भाऊ व रक्ताचे नाते खूप महत्त्वाचे आहे. आमच्यात या मुद्द्यावर अजिबात भांंडण होणार नाही,’ असा पुनरुच्चार राष्ट्रवादी युवती कॉँग्रेसच्या संस्थापक, खासदार सुप्रिया सुळे यांनी पत्रकारांशी बोलताना केला.
राष्ट्रवादीच्यावतीनेनाशिक विभागीय सोशल मीडिया कार्यशाळेसाठी त्या आल्या असता पत्रकारांशी बोलत होत्या. ठाण्यातील मंदा म्हात्रे यांच्यासह काही महिला पदाधिकाऱ्यांनी संधी न मिळाल्याने पक्ष नेतृत्वावर टीका केल्याबद्दल त्यांनी सांगितले की, ज्यांनी महिलांना ३३ टक्के आरक्षणाचा निर्णय घेतला त्या पक्षाच्या ज्येष्ठ नेत्यांवर टीका करणे चुकीचे आहे. ज्यांना पक्ष सोडून जायचे त्यांनी स्वखुशीने जावे, त्यांना माझ्या वैयक्तिक शुभेच्छा आहेत. मात्र महिलांबाबत सर्वाधिक कार्य राष्ट्रवादीनेच केले आहे. आज महाराष्ट्रात स्त्रीभ्रूण हत्त्या व कुपोषण कमी झाले ते केवळ राष्ट्रवादी युवती कॉँग्रेसच्या प्रयत्नांमुळेच. त्यामुळे पक्ष महिलांना डावलतो, हा आरोप चुकीचा आहे. अनेक मंत्र्यांवर भ्रष्टाचाराचे आरोप असल्याने निवडणुकीला पक्ष कसा सामोरे जाणार, यावर त्यांनी भ्रष्टाचाराचे आरोप करणे सोपे असते; मात्र ते सिद्ध होणे महत्त्वाचे असते. लोकशाहीत काही काळानंतर पराभव होतोच. लोकसभेच्या पराभवामुळे पक्षाला आत्मपरीक्षण करावे लागणार आहे. पक्ष व संघटनेचे नेमके कुठे चुकले, आम्ही कुठे कमी पडलो याचे चिंतन करण्याची गरज असल्याचे खासदार सुळे यांनी सांगितले. त्यादृष्टीने निर्धार मेळाव्यांना पक्षाचे ज्येष्ठ मंत्री व नेते विभागनिहाय बैठका घेत असल्याचेही त्यांनी सांगितले. राष्ट्रवादी युवतीच्या पदाधिकाऱ्यांना विधानसभेत उमेदवारीची संधी दिली तर निश्चितपणे युवती निवडणूक लढवतील; मात्र तिकीट देण्याचा निर्णय सर्वस्वी प्रदेशाध्यक्षांचा आहे. रेल्वेची भाडेवाढ ही एकदम करण्यापेक्षा टप्प्याटप्प्यांत करणे गरजेचे होते, तीही संसदेत चर्चा करून भाडेवाढ करायला हवी होती, अशी टीका त्यांनी यावेळी केंद्र सरकारवर केली. यावेळी माजी खासदार समीर भुजबळ, देवीदास पिंगळे, प्रदेश उपाध्यक्ष सुनील बागुल, जिल्हाध्यक्ष अ‍ॅड. रवींद्र पगार, शहराध्यक्ष अर्जुन टिळे आदि उपस्थित होते. (प्रतिनिधी)