मालेगाव (नाशिक) - मुंबई आग्रा महामार्गावरील उमराणे जवळील सांगवी फाटा येथे सकाळी 9 वाजेच्या दरम्यान नाशिक वरून चाळीसगावकडे जाणारी बस गतिरोधकाजवळ कंटेनरला पाठीमागून धडकली. यात 27 प्रवासी जखमी झाले. या अपघातावेळीअपघातग्रस्त बसमधून प्रवास करणारे उमराणे येथील मालेगाव शेतकी संघाचे माजी चेअरमन रत्नाकर शिवाजी देवरे यांनी प्रसंगाचे गांभीर्य लक्षात घेऊन तात्काळ जाणता राजा मित्रमंडळाचे अध्यक्ष नंदन देवरे यांना मोबाईल वरून अपघाताची माहिती दिली. देवरे यांनी मंडळाच्या कार्यकर्त्यांसह अपघात स्थळी मदतीसाठी धाव घेतली. तसेच उमराणे बाजार समिती, सौंदाने ,उमराणे व सोमा कंपनीच्या रुग्णवाहिकांना घटनास्थळी बोलावून 27 जखमी प्रवाशांना तात्काळ उमराणे ग्रामीण रुग्णालयात प्राथमिक उपचारासाठी दाखल केले. यावेळी जाणता राजा मित्रमंडळाचे कार्यकर्ते,बाजार समितीचे रुग्णवाहिका सेवक व कर्मचारी, तसेच उमराणे,सांगवी, चिंचवे येथील नागरिक व सोमा कंपनीच्या कर्मचाऱ्यांनी अपघातग्रस्त प्रवाशांना मदत केली.
Accident: मालेगावजवळ बस कंटेनरला धडकली, भीषण अपघातात २७ प्रवासी जखमी
By suyog.joshi | Updated: February 7, 2023 13:16 IST