डेबिट कार्डाची आदलाबदल करत ७० हजारांना गंडा

याप्रकरणी हबीब बेग मोगल बेग मिर्झा (रा. ड्रिमपार्क, अशोका मार्ग) यांनी दिलेल्या फिर्यादीनुसार संशयिताविरूद्ध गुन्हा दाखल करण्यात आला आहे. त्यानुसार मिर्झा हे ३१ डिसेंबर रोजी सकाळी अकराच्या सुमारास द्वारका येथील स्टेट बॅंकेच्या एटीएम केंद्रात गेले होते. यावेळी पैसे काढण्यासाठी त्यांनी एका अज्ञात व्यक्तीकडे मदत मागितली व आपले डेबिट कार्ड त्याच्याकडे दिले. मात्र, त्या अज्ञात व्यक्तीने रक्कम यंत्रातून येत नसल्याचे भासवून मिर्झा यांचे कार्ड स्वत:जवळ ठेवले व त्याच्याकडे असलेले दुसरे बंद डेबिट कार्ड मिर्झा यांना दिले. त्यानंतर काही वेळाने मिर्झा यांच्या खात्यातून त्या संशयित चोरट्याने २९ हजार ३८ रुपयांची रक्कम काढली. तसेच ३९ हजार ९२९ रुपयांची कार्डद्वारे ऑनलाईन खरेदी करत त्यांची एकूण ६८ हजार ९६७ रुपयांची फसवणूक केली. याप्रकरणी पोलीस उपनिरीक्षक राऊत अधिक तपास करत आहे.

---

कारच्या धडकेत वृद्ध ठार

नाशिक : रस्ता ओलांडत असताना एका भरधाव कारने दिलेल्या धडकेत वृद्धाचा मृत्यू झाल्याची घटना म्हसरूळ परिसरात घडली. सुभाष वामन दाणी (६३, रा. दादासाहेब गायकवाडनगर) असे अपघातात मयत झालेल्या व्यक्तीचे नाव आहे. याप्रकरणी सुनील दिगंबर पगारे यांनी दिलेल्या फिर्यादीवरून म्हसरुळ पोलीस ठाण्यात अज्ञात कारचालकाविरुद्ध गुन्हा दाखल करण्यात आला. १५ डिसेंबर २०२० रोजी सायंकाळी साडेपाच वाजता सुभाष दाणी हे म्हसरुळ परिसरात रस्ता ओलंडत असताना दिंडोरीकडून नाशिककडे येणाऱ्या अज्ञात भरधाव कारने दाणी यांना धडक दिली. त्यामुळे दाणी यांचे डोके व हातापायास गंभीर मार लागला होता. त्यांना उपारासाठी एका खासगी रुग्णालयात दाखल करण्यात आले होते उपचार सुरू असताना त्यांना डॉक्टरांनी तपासून मयत घोषित केले.

---

वाहनांच्या धडकेत दोघे जखमी

नाशिक : भरधाव कारने दुचाकीला दिलेल्या धडकेत शनिवारी (दि. २) सकाळी देवळाली-पाथर्डी रस्त्यावर दुचाकीस्वार सचिन एकनाथ लोखंडे (रा. शनिमंदिरामागे, पाथर्डी फाटा) हा युवक जखमी झाला. शनिवारी लोखंडे हे नाशिकरोडकडून पाथर्डी फाट्याकडे जात असताना समोरून येणाऱ्या कारच्या (एमएच १५ ईएक्स ५२१०) चालकाने रस्त्याच्या परिस्थितीकडे दुर्लक्ष करत त्यांच्या दुचाकीला धडक दिली. याप्रकरणी इंदिरानगर पोलीस ठाण्यात त्यांनी तक्रार दिली आहे.

दुसऱ्या घटनेत भरधाव मोटारसायकलने धडक दिल्याने रविवारी रात्री बेळगाव ढगा परिसरात कुंडलिक लक्ष्मण गांगुर्डे (६६) हे वृद्ध जखमी झाले. त्यांनी दिलेल्या फिर्यादीवरून संशयित गोटीराम जाधव (रा. कोळीवाडा, बेळगावढगा) याच्याविरोधात सातपूर पोलीस ठाण्यात गुन्हा दाखल करण्यात आला आहे.