नाशिकरोड : छत्रपती शिवाजी महाराज पुतळ्यासमोरील उड्डाणपुलाखाली कुरिअर डिलिव्हरी करणाऱ्या पिकअप वाहनाच्या उघड्या दरवाजातून ४० मोबाईल व चार स्मार्ट वॉच, असा सव्वादोन लाखांचा माल चोरून नेणाऱ्या संशयित शुभम दीपक कुऱ्हाडे याला नाशिकरोड पोलिसांनी अटक केली. पोलिसांनी त्याच्याकडून मोबाईलसह, स्मार्ट वॉचही जप्त करण्यात केले आहे.
छत्रपती शिवाजी महाराज पुतळ्यासमोरील उड्डाणपुलाखाली कुरिअर डिलिव्हरी करणारी पिकअप गाडी गुरुवारी उभी असताना या पिकअप वाहनाच्या उघड्या दरवाजातून अज्ञात चोरट्याने ४० मोबाईल व चार स्मार्ट वॉच असलेला बॉक्स गुपचूप चोरून नेला होता. याप्रकरणी नाशिकरोड पोलीस ठाण्यात दोन दिवसापूर्वी गुन्हा दाखल झाल्यानंतर या गुन्ह्याचा तपास गुन्हे शोध पथकाकडे सोपविण्यात आला होता. पथकातील कर्मचारी चोरीचा तपास करीत असताना पोलीस हवालदार राजेश साबळे यांना मोबाईलचा बॉक्स चोरून नेणाऱ्या व्यक्तीची गोपनीय माहिती मिळाली. माहितीच्या आधारे सहायक पोलीस निरीक्षक योगेश पाटील, जयेश गांगुर्डे, अविनाश जुंद्रे, अविनाश देवरे, विशाल कुवर, महेंद्र जाधव, समाधान वाजे, अजय देशमुख, योगेश रानडे यांनी जेलरोड परिसरात सापळा रचून संशयित शुभम दीपक कुऱ्हाडे याला पकडून त्याची कसून चौकशी केली. यावेळी संशयित शुभम याच्याकडून पिकअप गाडीतून सव्वा दोन लाख रुपये किमतीचे चोरलेले ४० मोबाईल व चार स्मार्ट वॉच नाशिकरोड पोलिसांनी जप्त केले.