१७० मिळकती अधांतरी

न्यायालयाच्या सुनावणीकडे लक्ष : शहरात नाममात्र दराने होतोय वापर

नाशिक : गंगापूररोडवर महापालिकेच्या मालकीची परंतु समर्थ महिला मंडळाच्या ताब्यात असलेली अभ्यासिका न्यायालयाच्या आदेशानुसार पालिका प्रशासनाने सील केल्यानंतर आता अन्य १७० मिळकतींचे भवितव्य अधांतरी आहे. या मिळकती ज्यांच्या ताब्यात आहेत, अशा संस्थांना न्यायालयाचे समन्स बजावण्यास प्रारंभ झाला असून, येत्या ६ आॅक्टोबर रोजी पुढील सुनावणी होणार आहे. त्यामुळे या मिळकतींविषयी न्यायालय काय भूमिका घेते याकडे साऱ्यांचे लक्ष लागून आहे.
महापालिकेच्या वतीने बांधण्यात आलेल्या साडेसहाशे मिळकतींपैकी अनेक मिळकती या नाममात्र दराने आजी-माजी नगरसेवकांना किंवा त्यांच्या संस्थांना दिल्या असून, अशाच काही जागांसंदर्भात येथील अ‍ॅड. बाळासाहेब चौधरी यांनी मुंबई उच्च न्यायालयात याचिका दाखल केली आहे. या याचिकेच्या सुनावणीत न्यायालयाने दिलेल्या आदेशानुसार महापालिकेने गंगापूररोडवर भाजपा नगरसेवक सीमा हिरे यांच्या समर्थ महिला मंडळाच्या ताब्यात असलेली जागा ताब्यात घेण्याचे आदेश एप्रिल महिन्यात दिले होते. त्यानुसार महापालिकेकडे ताबा मिळाला असला, तरी यासंदर्भात उच्च न्यायालयात झालेली सुनावणी आणि त्यानंतर महापालिकेच्या प्रभारी आयुक्त सोनाली पोंक्षे यांनी दिलेल्या सूचनेनुसार महापालिकेने बुधवारी सकाळी मिळकत सील केली. त्यानुसार प्रतिज्ञापत्र आणि संबंधित अभ्यासिकेची छायाचित्रे उच्च न्यायालयात सादर केली जाणार आहेत.
दरम्यान, महापालिकेने ज्या १७१ मिळकतींची यादी उच्च न्यायालयात सादर केली होती, त्या मिळकती ज्या व्यक्ती आणि संस्थांच्या ताब्यात आहेत त्यांना समन्स बजावण्यास प्रारंभ झाला असून, पुढील सुनावणी ६ आॅक्टोबर रोजी होणार आहे. त्यामुळे या मिळकतींविषयी न्यायालय काय आदेश देते याकडे संबंधितांचे लक्ष लागून आहे.