सावतानगरला ऑक्सिजन बेडसह १६० खाटांचे कोविड सेंटर

बुधवारी (दि. १४) रोजी वैद्यकीय अधिकारी आवेश पलोड व अधिकाऱ्यांनी या कोविड सेंटरची पाहणी करीत काही सूचना केल्या. कोरोनाचे रुग्ण वाढत असताना उपचारासाठी कोविड सेंटर नसल्याने त्यांचे हाल होत आहेत. मनपाकडून सिडकोतील प्रभाग क्रमांक २५ मधील सावतानगर येथील क्रॉम्प्टन हॉल (सावरकर हॉल) येथे ६० ऑक्सिजन बेड व रायगड चौक मनपा शाळेत १०० बेड असे १६० बेडचे कोविड सेंटर उभारण्याचे काम अंतिम टप्प्यात असून दोन दिवसांत हे दोन्ही कोविड सेंटर सुरू होणार असल्याची माहिती शिवसेना महानगर प्रमुख सुधाकर बडगुजर यांनी सांगितली.

शहरातील सर्वाधिक कोरोना रुग्ण सिडको भागात आहेत. त्यामुळे सिडको विभाग कोरोना हॉटस्पॉट झाला आहे. मनपाचे शहरातील सर्व विभागात कोरोना रुग्णांसाठी कोविड सेंटर आहे. परंतु सिडको भागात कोरोना रुग्ण असूनही कोविड सेंटर नव्हते, त्यामुळे सिडको भागातील सर्वसामान्य असलेल्या कोरोना रुग्णांना उपचारासाठी नाशकातील मनपाचे झाकीर हुसेन हॉस्पिटल किंवा नाशिक रोड भागातील बिटको हॉस्पिटल येथे जावे लागत होते. कित्येकदा तेथील हॉस्पिटल फुल्ल असल्याने सिडकोतील रुग्णांना परत पाठविले जात होते. सर्वसामान्य रुग्णांना अखेर खासगी रुग्णालयात उपचार घ्यावे लागत होते. मागील वर्षी कोरोना रुग्ण वाढल्यानंतर सिडकोतील सावतानगर भागात कोविड सेंटर उभारावे व या सेंटरमध्ये ऑक्सिजन बेड, व्हेंटिलेटर बेड, आयसीयू विभाग यासह सुविधा उपलब्ध करून द्यावे, अशी मागणी नागरिकांनी केली होती.

कोट===

गेल्या काही दिवसांपासून कोरोना पॉझिटिव्ह रुग्णांची संख्या झपाट्याने वाढत असून, रुग्णांना बेडदेखील उपलब्ध होत नाहीत. यामुळे सिडको भागातही कोविड सेंटर सुरू करण्याचे मनपाकडे मागणी केली. परंतु मनपाकडे पुरेसे संख्याबळ नसल्याने प्रभागातील एम.डी. फिजिशियनसह सुमारे १२ डॉक्टरांनी रुग्णांना मोफत सेवा देण्याचे आश्वासन दिले आहे.

-सुधाकर बडगुजर, महानगर प्रमुख शिवसेना

(फोटो डेस्कॅनवर)