जिल्हा परिषदेची बत्ती गूल, दुसरा दिवसही जनरेटरवरच

नंदुरबार : जिल्हा परिषदेच्या ७० हजाराच्या थकीत बिलापोटी वीज कंपनीने दोन दिवसांपासून वीज पुरवठा खंडित केला आहे. शुक्रवारी दिवसभर जनरेटरवर कामकाज चालले. त्यातही डिजेल संपल्याने दोन तास काम ठप्प पडले होते. दरम्यान, कोरोना काळातील कामकाज, मार्च एण्डचे काम सुरू असतांना वीज कंपनीने हा पवित्रा घेतल्याने जिल्हा परिषदेने नाराजी व्यक्त केली.

जिल्हा परिषदेकडे वीज कपंनीचे ७० हजार रुपये बील थकीत आहे. यापूर्वीचे बील जिल्हा परिषदेने भरले आहे. परंतु महिनाभराचे बील थकले आहे. त्यामुळे वीज कंपनीने थेट जिल्हा परिषदेचा वीज पुरवठाच गुरुवारी दुपारी खंडित केला. शुक्रवारी धावपळ करून ७०हजार रुपयांच्या वीज बिलाचा भरणा केला. परंतु सायंकाळपर्यंत वीज पुरवठा सुरळीत होऊ शकला नव्हता. त्यामुळे जनरेटरवरच कामकाज सुरू ठेवावे लागले. त्यातही दुपारी जनरेटरमधील डिजेल संपल्याने पुन्हा दोन तास सर्व कामकाज ठप्प झाले होते. सायंकाळ उशीरापर्यंत वीज जोडणी झालेली नव्हती.

सद्या कोरोना काळातील विविध कामकाज आरोग्य विभागासह इतर विभागात सुरू आहे. अशा संवेदनशील काळात वीज कंपनीने थेट वीज पुरवठा खंडित करण्याचा निर्णय घेणे कितपत योग्य असे जिल्हा परिषदेत चर्चीले जात होते. दुसरीकडे मार्च एण्डचे कामे देखील धावपळीत सुरू आहेत. असे असतांना थेट वीज पुरवठा खंडित करण्यामुळे नाराजीही व्यक्त करण्यात आली.