यंदा श्रावण २९ दिवसांचा; मंदिरात प्रवेश मिळणार का?

यंदा श्रावण महिना ९ ऑगस्‍टपासून सुरू होत आहे. ६ सप्‍टेंबरपर्यंत हा महिना असणार आहे. श्रावण महिन्यात मंदिरावर अवलंबून असणाऱ्या हार, फुले, मिठाई, नारळ या विक्रेत्यांचा व्यवसायदेखील चांगला होतो. या विक्रीमुळे आर्थिक उलाढाल मोठ्या प्रमाणात होते. मात्र, यंदा त्यांच्या पदरी निराशाच येणार असल्याचे चित्र दिसून येत आहे.

श्रावण सोमवार

पहिला - ९ ऑगस्ट, दुसरा - १६ ऑगस्ट, तिसरा - २३ ऑगस्ट, चौथा -३० ऑगस्ट,

९ ऑगस्‍टपासून श्रावण महिना सुरू होत आहे. महिनाभर सर्व मंदिरांमध्ये पूजा-अर्चा होत असते. या काळात मंदिर परिसरात आर्थिक उलाढाल वाढत असते. विशेषतः सोमवारी भक्तांची मोठ्या प्रमाणात गर्दी होते. मात्र, यंदा कोरोनामुळे मंदिरे उघडली नसल्याने भक्तांना देवाच्या दर्शनाविनाच श्रावण महिना काढावा लागणार आहे. कोरोनाचा संसर्ग रोखणे गरजेचे असले तरीदेखील मंदिरावर अवलंबून असणाऱ्या अनेक कुटुंबांचा या महिन्यात व्यवसाय बुडणार आहे.

मंदिरात येणाऱ्या भक्तांवरच आमचा व्यवसाय अवलंबून असतो. मागील दोन वर्षे व्यवसाय पूर्णपणे ठप्प असल्याने उदरनिर्वाहाचा प्रश्न उभा ठाकला आहे. सरकारने आमच्या व्यथांकडे लक्ष द्यावे. तसेच मंदिरांवर व्यवसाय अवलंबून असलेल्यांना आर्थिक मदत करावी.

- भूषण पाटील, नारळ विक्रेते

हारांचा व्यवसाय हा आमचा कौटुंबिक व्यवसाय आहे. घरातील सर्व सदस्य मिळून हा व्यवसाय चालवितो. त्यामुळे या व्यवसायावरच आमची उपजीविका चालते. मात्र, मंदिर बंद असल्याने आमच्यावर उपासमारीची वेळ आली आहे. सरकारने आमच्या व्यथा लक्षात घेऊन मंदिरे लवकरात लवकर सुरू करावीत.

- योगेश माळी, हार विक्रेते