जयनगर येथील अंगारकी चतुर्थीला होणारा यात्रोत्सव रद्द

शहादा तालुक्यातील जयनगर येथे श्री हेरंब गणेशाचे प्रसिद्ध देवस्थान आहे. अंगारकी चतुर्थीला खानदेशसह गुजरात व मध्य प्रदेशातून हजारो भाविक दर्शनासाठी व नवस फेडण्यासाठी येतात. त्यामुळे अंगारकी चतुर्थीला मंदिर परिसराला यात्रेचे स्वरूप प्राप्त होते. येथील श्री हेरंब गणेशाचे मंदिर हेमाडपंती असून अहिल्यादेवी होळकर यांच्या काळातील स्वयंभू गणेशाची मूर्ती आहे. त्यामुळे भाविकांमध्ये या देवस्थानाबद्दल अपार श्रद्धा आहे. वर्षातून एक अथवा दोन मंगळवारी अंगारकी चतुर्थीचा योग येतो. मागील वर्षी कोरोनामुळे सर्व मंदिरे बंद होती. योगायोगाने मागील वर्षी एकही अंगारकी चतुर्थीचा योग आला नाही. दीड वर्षानंतर आता अंगारकी चतुर्थीचा योग आला आहे. मात्र, यात्रा रद्द केल्याने भाविकांचा हिरमोड झाला आहे. हेरंब गणेश मंदिर ट्रस्टचे अध्यक्ष हिरालाल माळी व विश्वस्त मंडळाकडून मंगळवारी अंगारकी चतुर्थीला दर्शनाला व नवस फेडायला भाविकांनी यात्रोत्सव रद्द झाल्याने येऊ नये, असे आवाहन केले आहे.

व्यावसायिकांना फटका

अंगारकी चतुर्थीला जयनगर येथे मंदिर परिसराला यात्रेचे स्वरूप प्राप्त होते. हजारो भाविकांसोबत अनेक दुकानदार नारळ, पूजेचे साहित्य, खेळणी, रसवंतीगृह, उपाहारगृहे आदी दुकाने लावतात. परंतु, कोरोनाच्या वाढत्या प्रभावामुळे येत्या मंगळवारी अंगारकी चतुर्थीनिमित्त भरणारी यात्रा सारंगखेडा पोलीस स्टेशनने रद्द करण्याचे आदेश दिल्याने दुकानदारांनी आपली दुकाने लावू नयेत, असे मंदिर ट्रस्टकडून आवाहन करण्यात आले आहे. यामुळे दुकानदारांना आर्थिक नुकसानीला सामोरे जावे लागणार आहे.