परिवारासह पाड्यातून निघून जावे यासाठी महिलेला जमावाची मारहाण

नंदुरबार : परिवारासह पाड्यातून निघून जावे म्हणून महिलेशी वाद घालून दहा जणांनी तिला बेदम मारहाण करून ठार मारण्याची धमकी दिल्याची घटना मनवाणीचा चासुटीपाणीपाडा, ता.धडगाव येथे घडली. याप्रकरणी जमावाविरुद्ध गुन्हा दाखल करण्यात आला आहे.

याबाबत पोलीस सूत्रांनुसार, सामटी दयाराम पाडवी मनवाणीचा चासुटीपाणीपाडा, ता.धडगाव या महिलेने पाड्यातून परिवारासह निघून जावे यासाठी तिच्यामागे मेलदी खोजल्या वळवी व इतरांनी तगादा लावला होता. त्यावरून त्यांच्यात वाददेखील झाला होता. वादातून जमावाने थेट त्यांच्यावर वार करीत हाताबुक्क्यांनी मारहाण करून शिवीगाळ केली.

याबाबत महिलेने धडगाव पोलिसात धाव घेत जमावाविरुद्ध फिर्याद दिली. त्यांच्या फिर्यादीवरून मेलदी खोजल्या वळवी, खोजल्या बाज्या वळवी, सोन्या गुजऱ्या वळवी, आत्रा गुजऱ्या वळवी, रमेश फुर्ता वळवी, गणपत सोन्या वळवी, नाऱ्या खोजल्या वळवी, संपत सोन्या वळवी, सुभाष जान्या वळवी, फत्तेसिंग वळवी सर्व रा.मनवाणीचा चासुटीपाणीपाडा, ता.धडगाव यांच्याविरुद्ध जमाव जमवणे, मारहाण व इतर कलमान्वये गुन्हा दाखल करण्यात आला आहे. तपास पोलीस नाईक दिलीप वसावे करीत आहे.