कोणी लस घेता का लस..!

नंदुरबार : राज्यातील विविध भागांत कोरोना प्रतिबंधक लसींचा तुटवडा असताना, जिल्ह्यात मात्र एक लाखांपेक्षा अधिक डोस नागरिकांना देण्यात आले आहेत. एकीकडे लसीकरणासाठी ४५ केंद्रे नियुक्त असताना, या केंद्रांवर नागरिकांनी यावे, यासाठी आरोग्य विभाग इतर विभागांच्या मदतीने लसीकरण मोहीम राबवत नागरिकांना लस घेण्याचे आवाहन करत आहे.

जानेवारीच्या मध्यापासून सुरू झालेल्या लसीकरणात नंदुरबार जिल्ह्याने नेहमीच आघाडी कायम ठेवली आहे. यातून आरोग्य कर्मचारी व हेल्थकेअर वर्कर यांना आतापर्यंत २८ हजार ९१७ लसींचा प्रथम डोस, तर १४ हजार २१२ लसींचा दुसरा डोस पूर्ण करण्यात आला आहे. एकूण ६२ टक्के आरोग्य व फ्रंटलाईन वर्कर यांचे लसीकरण पूर्ण झाले आहे. हे सुरू असताना, ४५ वर्षांवरील ७४ हजार ८७० जणांना प्रथम, तर ३४ हजार नागरिकांना दुसरा डोस देण्यात आला आहे. लसीकरणाची गती ही कायम असताना, आरोग्य विभागाकडून नुकतेच २५ हजार डोसेस प्राप्त झाले होते. यातून १८ वर्षांवरील युवकांना लस देण्यास सुरुवात करण्यात आली आहे. यातून आतापर्यंत २ हजार ३७८ जणांना लस देण्यात आल्याची माहिती आहे. लस घेण्यासाठी जिल्ह्यातील लसीकरण केंद्रांवर गर्दी नसली,तरी शिक्षण विभागाने आदेशित केलेल्या शिक्षकांकडून होत असलेल्या जनजागृतीमुळे ग्रामीण भागातील नागरिक केंद्रांवर येत आहेत. तरीही काही ठिकाणी अपेक्षित टारगेट पूर्ण होत नसल्याने नागरिकांची मनधरणी करावी लागत आहे.

नुकतीच लस घेतली. लस घेतल्याचे समाधान आहे. ही लस आरोग्यदायी आहे. नागरिकांनी लस घेतली पाहिजे. त्यातून कोरोनाचा धोका कमी होणार आहे. नागरिकांचे आरोग्य चांगले राहील.

- आदित्य वळवी

वय १९, नंदुरबार.,

६० वर्षे गटात उत्साह

नंदुरबार जिल्ह्यात ज्येष्ठांमध्ये लसीकरणाचा उत्साह आहे. यातून आतापर्यंत या वयोगटात ७५ हजार डोसेस दिले गेल्याचे दिसून आले आहे. यामुळे लवकरच एक लाखाचा आकडा पार होण्याची शक्यता आहे.

४५ वयोगट उदासीन

जिल्ह्यातील ४५ वर्षे वयोगटातील ४० हजार नागरिकांनी आतापर्यंत लस घेतल्याचे सांगण्यात येत आहे. हा पहिला डोस आहे. दुसरा डोस घेणारे मात्र अद्याप वाढलेले नाहीत. लवकरच ही संख्याही वाढणार आहे.

युवकांचा उत्साह

युवकांसाठी लसीकरण सुरू होऊन आठवडाही उलटलेला नाही. यात लसींचा तुटवडा दोन दिवस होता. परंतु तूर्तास लस उपलब्ध असल्याने २ हजारपेक्षा अधिकजणांनी नोंदणी करून पहिला डोस घेतला.

आरोग्य विभागाकडून योग्य पद्धतीने लसीकरण सुरू आहे. लसीकरण वाढावे, यासाठी जनजागृतीवर भर देण्यात येत आहे. आरोग्य कर्मचारी, आशा गावोगावी लसीचे महत्त्व पटवून देत आहेत. यातून जिल्ह्याचे लसीकरणाचे उद्दिष्ट्य पूर्ण होणार आहे.

-डाॅ. एन. डी. बोडके,

जिल्हा आरोग्य अधिकारी, नंदुरबार.