घरकुल योजनेचा लाभ न मिळाल्यास बेेमुदत उपोषणाचा इशारा

नंदुरबार - तालुक्यातील उमर्दे गावात २०११पासून आजतागायत एकाही लाभार्थ्याला घरकुल मंजूर करण्यात आलेले नाही. येत्या १५ मार्चपर्यंत लाभार्थींना घरकुल न दिल्यास बेमुदत उपोषण करण्याचा इशारा प्रहार जनशक्ती पक्षाचे तालुकाध्यक्ष गुलाब महारु मराठे यांनी निवेदनाद्वारे दिला आहे. याबाबतचे निवेदन जिल्हाधिकाऱ्यांना देण्यात आले.

उमर्दे गावातील लाभार्थींना २०११पासून आजवर ‘प्रधानमंत्री आवास योजनें’तर्गत एकही घरकुल मंजूर झालेले नाही. अनेकदा पाठपुरावा केल्यानंतरही कोणीही याची दखल घेतलेली नाही. त्यामुळे येथील लाभार्थी मोठ्या प्रमाणावर घरकुलांपासून वंचित राहिले आहेत. गावाची लोकसंख्या साडेतीन ते साडेचार हजार आहे. आवास योजनेचे लाभार्थी येथे आहेत. मात्र, त्यानंतरही कार्यवाही करण्याकडे दुर्लक्ष करण्यात आले आहे. शासनाने घरकुल मंजूर करण्याबाबत तातडीने कार्यवाही न केल्यास १५ मार्चपासून जिल्हाधिकारी कार्यालयासमोर बेमुदत उपोषणाला सुरुवात करणार असल्याचे मराठे यांनी निवेदनात म्हटले आहे. या निवेदनावर गुलाब मराठे, कैलास रामा भिल, रविन भावराव बांडे, नामदेव शिवदास पेटकर, मुकेश गांगरे, राजू दामू बांडे यांच्या सह्या आहेत.