धडगाव तालुक्यात जलसाक्षरता सप्ताहानिमित्त विविध उपक्रम

सप्ताहाच्या पार्श्वभूमीवर विद्यार्थ्यांसाठी जैवविविधता निरीक्षण, माहिती व बीज संकलन हे उपक्रम राबवण्यात आले. वृक्ष, वेली ,झुडपे, पाण्यातील प्राणी यांची माहिती विद्यार्थ्यांना देण्यात आली. यादरम्यान विद्यार्थ्यांनी चिंच, बोर, टेंभरू, दोडके, गिलके, विविध प्रकारचे भोपळे, सीताफळ, मालकांगणी, सागरगोटी, गुळवेल, पळस, वाल, बेहडा, लिंबू, साग, खिरणी यांच्या हजारो बियांचे संकलन केले.

सप्ताहादरम्यान जागतिक चिमणी दिवसानिमित्त प्राचार्य डाॅ. एच. एम. पाटील यांनी चिमण्यांचे पर्यावरणातील महत्त्व या विषयावर मार्गदर्शन केले. सप्ताहात तीन महिन्यांपासून विद्यार्थी संकलित करत असलेल्या प्लॅस्टिक बाॅटल्सचा चिमण्यांसाठी अन्नदाणी आणि जलपात्र तयार करण्याचे प्रात्यक्षिक करून दाखविण्यात आले. प्रसंगी परिसरातील चिमण्यांचा अधिवास वाढण्यासाठी १०९ प्लॅस्टिक बाॅटल्सचा पुनर्वापर करण्यासाठी विद्यार्थ्यांना सोपवण्यात आल्या.

सप्ताहातील संध्यादर्शन कार्यक्रमात जलस्रोतांना भेट देणे, पक्षी निरीक्षण, आकाश निरीक्षण आदी उपक्रमात विद्यार्थी सहभागी झाले होते. दरम्यान, जागतिक वनदिवस साजरा करण्यात आला. यावेळी प्राचार्य डाॅ. पाटील यांनी पळसाच्या फुलांपासून होळीसाठी पर्यावरणपूरक नैसर्गिक रंग तयार करण्याचे प्रात्यक्षिक करून दाखविले. या रंगामुळे त्वचेला, डोळ्यांना व पर्यावरणाला हानिकारक असलेले रासायनिक रंग वापरणे कमी होईल, अशी माहिती त्यांनी दिली.

विद्यार्थ्यांनी संकलित केलेल्या बियांचे नर्सरीतल्या पिशव्यांमध्ये करुन जवळपास विविध प्रकारांच्या दोन हजार रोपांची सोय करण्यात आली.

कार्यक्रमाच्या समारोपप्रसंगी धनाजे येथील उपसरपंच चंद्रासिंग पावरा, शहादा येथील जायंटस फेडरेशनच्या उपाध्यक्ष संगीता पाटील, सामाजिक कार्यकर्ते अनिल पावरा, तलावडीचे आपसिंग पावरा,कालुसिंग पटले, राजेंद्र चावडा उपस्थित होते. विद्यार्थ्यांच्या माध्यमातून धनाजे, मुगबारी, मांडवी येथील २ हजार ४०० नागरिकांची या सप्ताहातून जनजागृती करण्यात आली. उपक्रमासाठी भरत पावरा, ब्रिजलाल पटले, जितेंद्र पावरा, अशोक पावरा, सुनील परमार, दशा पावरा, प्रा.अनिल शिंदे, प्रा.डाॅ. हरिभाऊ पवार, पानसिंग राहसे, अजय पटले, नोमा पावरा, प्रकाश पावरा यांनी परिश्रम घेतले.