वाहतूक शाखेकडून आधुनिक तंत्रज्ञानाचा वापर

लोकमत न्यूज नेटवर्क
नंदुरबार : वाहतुकीचे नियम तोडून पळालात तरी घरबसल्या दंडाची पावती व त्याअनुषंगाने मेसेज येईल. कुठे अपघात झाल्यास, रहदारी विस्कळीत झाल्यास त्याचा फोटो काढून अ‍ॅप्सवर टाकला तर वाहतूक पोलीस लागलीच त्या ठिकाणी जावून वाहतूस सुरळीत करतील. त्यासाठी पोलिसांच्या वाहतूक शाखेने महाट्रॅफिक अ‍ॅप तयार केले असून त्याचा जास्तीत जास्त उपयोग करून घ्यावा असे आवाहन पोलीस अधीक्षक महेंद्र पंडित यांनी केले आहे.
वाहतुकीचे नियम तोडले, वाहनांची कागदपत्रे सोबत राहिली नाहीत, त्यामुळे केस झाल्यास लागलीच दंड भरून पावती फाडण्याची गरज नाही. मोबाईलवर मेसेज आल्यास ठराविक दिवसांच्या कालावधीत दंडाची रक्कम भरता येईल किंवा आॅनलाईन देखील भरता येणार आहे. महाट्रॅफिक अ‍ॅपद्वारे ही सुविधा आता वाहतूक पोलीस शाखेने उपलब्ध करून दिली असल्याची माहिती पोलीस अधीक्षक महेंद्र पंडित यांनी दिली.
याबाबत अधिक माहिती देतांना पंडित यांनी सांगितले, वाहतुकीच्या नियमांची अंमलबजावणी व्हावी आणि बेशिस्त व वाहतुकीचे नियम न पाळणाऱ्या वाहनधारकांवर कारवाई व्हावी याकरीता हे अ‍ॅप्स विकसीत करण्यात आले आहे.
वाहतुक शाखांमध्ये कर्मचाऱ्यांची असलेली कमतरता, त्यांच्या कामाची मर्यादा आणि इतर बाबी लक्षात घेता आता आॅनलाईनवर सर्व भर दिला जात आहे. नंदुरबारात याद्वारे दंड करणे, कारवाई करणे या बाबी गेल्या महिनाभर आधीपासूनच सुरु करण्यात आल्या आहेत. कर्मचाºयांना त्याबाबत प्रशिक्षण देखील देण्यात आलेले आहे. त्याचा चांगला परिणाम आणि कारवाईची संख्या वाढण्यास मदत झाली असल्याचेही पोलीस अधीक्षक पंडित यांनी स्पष्ट केले.
दोन प्रकारचा उपयोग
या अ‍ॅप्सद्वारे रहदारीचे नियम तोडणाºयांवर कारवाई करणे आणि वाहतूक व्यवस्था सुधारणे हे दोन उपयोग महत्वपुर्ण आहेत. एखाद्या वाहन चालकाने सिग्नलची तोडून झेब्रा क्रॉसिंगच्या पुढे वाहन चालवून नेले, वाहन चालवितांना मोबाईलव बोलणे, पार्र्कींग नसतांना तेथे बेशिस्तपणे वाहन पार्र्कींग करणे, सीट बेल्ट न लावता वाहन चालविणे. तीन सीट दुचाकी चालविणे, वाहनांवर फॅन्सी नंबर प्लेट बसविणे आदी नियम तोडल्यास संबधीत चालकाचा आणि वाहनाचा फोटो अ‍ॅप्समध्ये काढून कारवाई करता येणार आहे. त्यामुळे कुणी नियम तोडून निघूनही गेला तरी त्याला दंडाची पावती मोबाईलवर घरबसल्या येणार आहे.
दुसरा उपयोग हा एखाद्या ठिकाणी अपघात झाला असेल, रस्त्यावर आॅईल किंवा लिक्विड पडलेले असेल, झाड पडलेले असेल, वाहतुक कोंडी झालेली असेल तर या अ‍ॅपद्वारे फोटो काढून कुणीही नागरिकाने टाकल्यास लागलीच वाहतूक पोलिसांना त्या ठिकाणी जावून वाहतूक सुरळीत करण्यासाठी मदत करता येऊ शकणार आहे.
नंदुरबार शहरातील वाहतूक व्यवस्था सुरळीत करण्यासाठी जास्तीत जास्त उपयोग या अ‍ॅप्सचा करण्यात येत आहे. यासाठी वाहतूक शाखेच्या कर्मचाºयांना संबधीत उपकरण देखील देण्यात आले आहे.
वाहतूक शाखेच्या कर्मचाºयाशी कुणी हुज्जत घातल्यास, कुणी दंडाची पावती फाडण्यास नकार दिला, कुणाजवळ दंडाचे पैसे भरण्यास नसल्यास आणि वाहतूक पोलिसाने वाहनाच्या नंबर प्लेटचा फोटो काढून कुठल्या नियमाअंतर्गत कारवाई केली ते संबधीताच्या रजिस्टर मोबाईलवर पाठविता येणार आहे.

इंटरसेप्टर वाहनाचाही होतोय उपयोग...
नंदुरबार शहरात वाहतुकीच्या नियोजनासाठी वाहतूक पोलिसांना विशेष प्रशिक्षण देण्यात आले आहे. शासनाने नंदुरबार वाहतूक शाखेला इंटरसेप्टर वाहन देखील उपलब्ध करून दिले आहे. या वाहनात सर्व अत्याधुनिक सुविधा उपलब्ध आहेत. मर्यादेपेक्षा अधीक वेगात वाहन चालविणे, दारू पिऊन वाहन चालविणे, काळी काचचा लेअर किती आहे ते मोजणे, वाहन चालवितांना मोबाईलवर संभाषण करणाºयांवर कारवाईचे उपकरणे या वाहनात बसविण्यात आले आहेत. त्याचाही चांगला उपयोग होत आहे.