शहाद्यातील दोन रुग्ण झाले कोरोनामुक्त

लोकमत न्यूज नेटवर्क
नंदुरबार : शहादा येथील दोन रुग्ण कोरोनामुक्त झाले आहेत. आता जिल्ह्यातील कोरोनामुक्तांची संख्या एकुण ३० झाली आहे. दरम्यान, नंदुरबार येथील गाझी नगरात प्रतिबंधीत क्षेत्र करण्यात आलेले नसल्याने येथील व्यवहार सर्वसामान्य असल्याचे प्रशासनाने स्पष्ट केले.
शहादा शहरात नव्याने दोन रुग्ण कोरोनाग्रस्त आढळले होते. त्यात गरीब नवाज कॉलनीतील एकजण हृद्ययावरील उपचारासाठी जिल्हा रुग्णालयात दाखल झाले असता त्यांना कोरोनाची लागण झाल्याचे निष्पन्न झाले होते. तर दुसरा रुग्ण हा रजा मशीद परिसरातील होते. हे दोन्ही रुग्ण ठणठणीत झाल्यानंतर त्यांचे दोन्ही अहवाल निगेटिव्ह आले. त्यामुळे गुरुवारी दोघांना कोवीड कक्षातून सुट्टी देण्यात आली. यातील एक रुग्ण हृदयावरील उपचारासाठी सुरत येथे रवाना झाले तर दुसरे रुग्ण हे शहादा येथे घरी रवाना झाले.
जिल्ह्यात आता कोरोनामुक्त झालेल्यांची संख्या ३० झाली आहे. शहादा तालुक्यात आता एकच रुग्ण आहे. हिंगणी येथील हा रुग्ण देखील लवकरच कोरोनामुक्त होणार असल्याचे जिल्हा रुग्णालयातील सूत्रांनी सांगितले.
दरम्यान, नंदुरबार येथील गाझीनगरात राहणारी कोरोनाग्रस्त महिला नाशिक येथून परस्पर जिल्हा रुग्णालयात दाखल झाली. त्यामुळे गाझी नगरातील कुटूंबांशी तिचा संपर्क झाला नाही. त्यामुळे प्रशासनाने हा परिसर प्रतिबंधीत क्षेत्र म्हणून जाहीर केलेला नाही. येथील सर्व व्यवहार सर्वसामान्य असल्याचे प्रशासनाने स्पष्ट केले आहे.