लसीकरणानंतरही दोन आरोग्य कर्मचारी कोरोना पॉझिटिव्ह

संपूर्ण देशात कोरोना लसीकरण मोहिमेचा शुभारंभ झाल्यानंतर पहिल्या टप्प्यात आरोग्यरक्षक म्हणून आरोग्य कर्मचाऱ्यांच्या लसीकरणास प्राधान्य देण्यात आले. या मोहिमेअंतर्गत शहादा तालुका क्षयरोग विभागातील कर्मचाऱ्यांचा लसीकरणाचा शुभारंभ १६ फेब्रुवारीला करण्यात आला. या विभागातील सर्व कर्मचाऱ्यांचे लसीकरण पूर्ण झाले असून त्यांना १६ मार्च रोजी दुसरा डोसही देण्यात आलेला आहे.

लसीकरणाचे दोन डोस घेतल्यानंतर शहादा तालुका क्षयरोग विभागातील कर्मचाऱ्यांबाबत धक्कादायक प्रकार उघडकीस आला आहे. एका ४५ वर्षीय महिला कर्मचाऱ्याच्या कुटुंबातील सदस्यांचा रिपोर्ट पॉझिटिव्ह आल्यानंतर या महिला कर्मचाऱ्याने १७ मार्चला तपासणीसाठी घशातील स्वॅबचे नमुने दिले होते. १९ मार्चला सायंकाळी उशिरा या महिलेचा रिपोर्ट हा कोरोना पॉझिटिव्ह आला आहे. असाच प्रकार एका पुरुष कर्मचाऱ्याबाबत घडला असून त्याचाही रिपोर्ट कोरोना पॉझिटिव्ह आला आहे.

विशेष म्हणजे या दोन्ही कर्मचाऱ्यांनी सहकारी कर्मचाऱ्यांसोबत लसीकरण मोहिमेत सहभाग घेतला होता. दोघांनी १६ फेब्रुवारीला पहिला डोस घेतला. त्यानंतर २८ दिवसांनी १६ मार्चला लसीचा दुसरा डोस घेतला. याप्रमाणे लसीकरणाचे नियम पाळून दोन्ही कर्मचारी आपापल्या नियमित सेवेवर कार्यरत होते. मात्र सध्या तालुक्यात कोरोनाबाधितांची संख्या वेगाने वाढत आहे. याच दरम्यान या दोघांनी पुन्हा १७ मार्चला तपासणीसाठी नमुने दिले असता दोघांचे रिपोर्ट पॉझिटिव्ह आले आहेत. यामुळे आरोग्य कर्मचाऱ्यांच्या मनात भीतीचे वातावरण निर्माण झाले आहे. आरोग्य विभागाच्या वरिष्ठ अधिकाऱ्यांनी या प्रकाराची विशेष लक्ष घालून चौकशी करावी, अशी मागणी जोर धरत आहे