दारुबंदी विभागाने पकडलेला ट्रक चोरट्यांनी केला लंपास

नंदुरबार : दारूबंदी विभागाने वर्षभरापूर्वी पकडलेला व जिल्हाधिकारी कार्यालय आवारात उभा असलेला पाच लाखांचा चारचाकी मिनी ट्रक चोरट्यांनी पळवल्याची घटना १७ मार्च रोजी घडली. मुख्य प्रशासकीय इमारत आवारात आणि पोलीस अधीक्षक कार्यालयापासून हाकेच्या अंतरावर ही घटना घडल्याने खळबळ उडाली आहे.

जिल्हा प्रशासकीय इमारतीत दारूबंदी विभागाचे कार्यालय आहे. या विभागाने जप्त केलेली वाहने येथील आवारातच उभी केली जातात. त्यासाठी इमारतीमागील मोकळी जागा देण्यात आली आहे. वर्षभरापूर्वी दारूबंदी विभागाने अवैध दारू वाहतूक करणारा मिनी ट्रक क्रमांक (एमएच १० एडलब्ल्यू ७०) पकडला होता. त्यातील मद्यसाठा गोडावूनमध्ये ठेऊन मिनी ट्रक जिल्हा प्रशासकीय इमारतीच्या मागील बाजूस उभा करण्यात आला होता. गेल्या वर्षभरापासून हा ट्रक तेथेच उभा होता. दरम्यान, चोरट्यांनी १० ते १७ मार्च दरम्यान हा ट्रक चोरून नेला आहे. १७ रोजी सकाळी दारूबंदी विभागाला हा मिनी ट्रक जागेवर नसल्याचे लक्षात आल्यावर शोधाशोध झाली, परंतु उपयोग झाला नाही.

याबाबत दारूबंदी विभागाचे दुय्यम निरीक्षक शैलेंद्र दत्तात्रय मराठे यांनी शहर पोलीस ठाण्यात फिर्याद दिल्यानुसार चोरीचा गुन्हा दाखल करण्यात आला आहे. दारूबंदी विभागातर्फे पोलिसांना वाहनाची सर्व कागदपत्र देण्यात आली असून, त्यादृष्टीने पोलिसांनी तपासाला गती दिली आहे. प्रशासकीय कार्यालय आवारातूनच तब्बल पाच लाखांचे वाहन चोरीला गेल्याने खळबळ उडाली आहे.