फुटलेल्या टायरसह ट्रक घुसला वसाहतीत

लोकमत न्यूज नेटवर्क
नंदुरबार : फरशी घेवून भरधाव जाणारा ट्रकचे टायर फुटलेले असतांनाही वळण रस्त्यावरील गुरुकुल कॉलनीत नेण्याचा प्रयत्न करणाऱ्या चालकाला नागरिकांनी चोप देत पोलिसांच्या ताब्यात दिले. या ट्रकचे पुढील काच देखील फुटलेले असून अपघात करून ट्रक पसार होण्याच्या बेतात असल्याचा संशय व्यक्त होत आहे. रात्री उशीरापर्यंत पोलिसात नोंद करण्याचे काम सुूूरू होते.
शहरातील वळण रस्त्यावरील होळ शिवाराील गुरुकुल कॉलनीत रविवारी सायंकाळी टायर फुटलेला भरधाव ट्रक (क्रमांक एमएच १८-बीए १८५१) शिरला. ट्रकची अवस्था पाहून काही युवक व नागरिक धास्तावले. त्यांनी ट्रकमागे पळत जावून एका शेताजवळ अडविला. ट्रकच्या एका बाजचे टायर निघून केवळ लोखंडी भाग तेवढा बाकी होता. ट्रकचे पुढील काच देखील फुटलेले होते. नागरिकांनी चालकाला ताब्यात घेत पोलिसांच्या ताब्यात दिले.
हा ट्रक निझर येथून आलेला असल्याचे समजते. त्या भागात रस्त्यात कुठेतरी अपघात करून ट्रक पसार होण्याच्या मार्गावर असतांना या भागात चालकाने लपण्याचा प्रयत्न केल्याची शक्यता आहे. पोलिसांनी चालकाकडून माहिती मिळविण्याचा प्रयत्न सुरू केला होता. रात्री उशीरापर्यंत नोंद झाली नव्हती.