प्रतापपूरच्या जंगलात तिघा भावंडांनी ६० वृक्षांची केली कत्तल; १४ दिवसांची कोठडी

नवापूर वनविभागाकडून मिळालेल्या माहितीनुसार, नवापूर तालुक्यातील प्रतापपूर जंगलात सागवान व कुडी जातीचे अवैधरीत्या वृक्ष कत्तल केल्याने १७ हजारांचे नुकसान झाले आहे. संशयित आरोपी विलास माहाऱ्या गावित, प्रवीण माहाऱ्या गावित व अरविंद माहाऱ्या गावित (सर्व रा.बोरझर, ता.नवापूर) हे अवैध वृक्षतोडीत सहभागी असल्याचे समजल्याने त्यांना तत्काळ त्यांच्या राहत्या घराजवळून ताब्यात घेऊन पोलीसपाटील बोरझर यांच्यासमक्ष अटक करून त्यांच्याविरुद्ध वन गुन्हाअंतर्गत गुन्हा नोंद केला. वनपाल बोरझर यांनी तिन्ही आरोपींना नवापूर न्यायालय येथे हजर केले असता नवापूर न्यायालयाने १४ दिवसांची न्यायालयीन कोठडी सुनावली. त्यानंतर आरोपींमार्फत जामीन अर्ज सादर केला असता न्यायालयाने प्रत्येक आरोपीस १५ हजार रुपयांच्या जामिनावर व काही अटी-शर्तीच्या अधीन राहून आरोपींना जामिनावर मुक्त करण्यात आले. ही कारवाई बोरझरचे प्रभारी वनपाल डी. के. जाधव, वनरक्षक कमलेश वसावे, संजय बडगुजर, अनिल वळवी, संतोष गायकवाड, संगीता खैरनार, भाग्यश्री पावरा यांनी केली. वनक्षेत्रपाल नवापूर (प्रा) यांच्या मार्गदर्शनाखाली राउंड स्टाफ बोरझर पुढील तपास करीत आहे.