व्यापाऱ्यांची लूट करणाऱ्यांना जेरबंद करावे

तळोदा शहरातील व्यापारी संघटनांच्या पदाधिकाऱ्यांनी जिल्हा पोलीस अधीक्षक महेंद्र पंडित यांची भेट घेऊन निवेदन सादर केले. निवेदनात, अक्कलकुवा व तळोदा भागात व्यापारी वर्गाला दिवसाढवळ्या लुटण्याचे प्रकार मागील काळात सतत सुरू होते. मात्र, पोलीस प्रशासनाने लुटारूंचा बंदोबस्त केला असल्याने या कारवायांना ब्रेक लागला आहे. दरम्यान, अक्कलकुवा येथे टायर पंक्चर करून लुटीचा प्रकार घडला असून, दर आठवड्याला किरकोळ व होलसेल व्यापाऱ्यांना वसुलीसाठी जावे लागते. त्यांच्यावर पाळत ठेवून त्यांची लूट केली जात असल्याने चिंता वाढल्या आहेत. निवेदनावर किराणा असोसिएशनचे धनराज जैन, पंकज पटेल, सराफ संघटनेचे प्रसाद सराफ, आनंद सोनार, कापड व्यापारी संघटनेचे गौतम जैन, केमिस्ट संघटनेचे हुकूम जैन, आनंद सोनार, प्रकाश कोचर, सुभाष चोपडा, चंद्रकांत ठाकूर, भूषण सोनार, रवी जोहरी, सुभाष चोपडा, सुभाष जैन, दिलीप जैन, पंकज पाटील, निखिल तूखरिया, राजेंद्र कोचर, राहुल जैन यांच्या सह्या आहेत.

दरम्यान, तळोदा व अक्कलकुवा परिसरात व्यापाऱ्यांची लूट करणारी टोळी असल्याची शक्यता निवेदनातून व्यक्त करण्यात आलेली आहे. भविष्यात असे प्रकार घडू नये व व्यापारी वर्गाला निर्भयपणे त्यांच्या मालाची रक्कम सुरक्षित नेण्यासाठी पोलीस प्रशासनाने गुन्हेगारांचा वेळीच छडा लावावा, अशी मागणी करण्यात आली आहे. मागील काळात लुटमारीचे प्रकार घडले होते. त्यामधील काही गुन्ह्यांचा तपास अजूनही लागलेला नाही. त्यामुळे व्यापारी वर्ग चिंतेत आहेत. या घटनांमधील अज्ञात चोरट्यांच्या शोध घेऊन त्यांच्यावर कडक कारवाईची मागणी व्यापारी संघटनांनी केली आहे.

यावेळी पोलीस अधीक्षक महेंद्र पंडित यांनी अक्कलकुवा येथे व्यापाऱ्याच्या गाडीतून पैसे लांबविण्याचा प्रकार सीसीटीव्हीत कैद झालेला आहे. प्रभारी अधिकाऱ्यांना आरोपींचा शोध घेण्याच्या सूचना दिल्या आहेत. मार्गावर ठिकठिकाणी पोलीस गस्त वाढविण्यात आली आहे. यापूर्वी घडलेल्या घटनांतील आरोपींना जेरबंद केले आहे. पोलिसांकडून योग्य तपास सुरू असल्याची माहिती दिली.