चोरट्यांनी दुचाकीसह आता ट्रक लंपास करण्याकडे वळविला मोर्चा

नंदुरबार : चोरट्यांनी दुचाकी चोरीसोबतच आता थेट मोठी वाहने चोरी करण्याकडे आपला मोर्चा वळविला आहे. वावद येथून नऊ लाखांचा ट्रक चोरट्यांनी लंपास केला. याबाबत नंदुरबार तालुका पोलीस ठाण्यात गुन्हा दाखल करण्यात आला.

जिल्ह्यात दुचाकी चोरीच्या घटना गेल्या काही दिवसात वाढल्या होत्या. मध्यंतरी मध्य प्रदेशातून एकाला अटक केल्यानंतर दुचाकी चोरीच्या घटनांचा उलगडा झाला होता. परंतु आताही काही ठिकाणी चोरीच्या घटना सुरूच आहेत. आता चोरट्यांनी दुचाकीसह थेट ट्रकच पळविण्यास सुरुवात केली आहे. वावद, ता.नंदुरबार येथील दिलीप मुरार चौधरी यांनी आपली एलपी ट्रक (क्रमांक एमएच १८-बीजी ३८६३) गावाच्या शिवारात उभी केलेली होती. चोरट्यांनी रात्रीच्या वेळी ट्रकच लंपास केली. चौधरी यांनी ठिकठिकाणी ट्रकचा शोध घेतला असता मिळून आली नाही.

याबाबत दिलीप चौधरी यांनी तालुका पोलीस ठाण्यात फिर्याद दाखल केल्याने नऊ लाखांच्या ट्रकची चोरी झाल्याप्रकरणी गुन्हा दाखल करण्यात आला आहे. तपास सहायक पोलीस निरीक्षक एकनाथ पाटील करीत आहे.