नव्याने सुरु झालेल्या कोविड केअर सेंटर्सच्या फायर ऑडिटबाबत प्रशासनातच दिसतोय संभ्रम

नंदुरबार : आरोग्य विभागाकडून कोरोना रुग्णांना अधिक चांगले उपचार देता यावेत यासाठी शासकीय इमारती अधिग्रहीत करुन कोविड केअर सेंटर्स सुरु केले आहेत. परंतू या इमारतींचे फायर ऑडिट झाले किंवा कसे याची माहिती मात्र देण्यात आलेली नाही. यातून प्रशासनात संभ्रम असून मुंबईच्या दुर्घटनेनंतर या इमारतींच्या तपासणी गरज आहे.

नंदुरबार शहरात दोन, शहादा तालुक्यातील मोहिदा, नवापूर आणि तळोदा तालुक्यातील सलसाडी या पाच ठिकाणी सध्या शासकीय कोविड केअर सेंटर्स तयार करण्यात आले आहेत. नंदुरबार शहरातील एकलव्य आणि महिला रुग्णालय या दोन्ही ठिकाणी सर्वाधिक बेडची व्यवस्था असून उर्वरित ठिकाणीही रुग्ण आहेत.

नंदुरबार शहरातील एकलव्य रेसिडेन्शियल स्कूलच्या इमारतीत पुन्हा कोविड केअर सेंटर सुरु झाले आहे. ही इमारत आदिवासी विकास विभागाची असून याठिकाणी सर्व प्रकारच्या सोयी असल्याची माहिती देण्यात आली आहे.

जिल्हा रुग्णालयाच्या मागील बाजूस असलेले महिला रुग्णालय हे गेल्या काही महिन्यांपासून सुरु झाले आहे. या इमारतीचे बांधकाम करुन त्याठिकाणी तातडीने कोविड केअर सेंटर सुरु झाले. याठिकाणी सर्व बेड हे ऑक्सिजन यंत्रणेसह आहेत.

मोहिदा ता. शहादा येथील सामाजिक न्याय विभागाच्या वसतीगृहांच्या इमारतीत कोविड केअर सेंटर सुरु झाले आहेत. याठिकाणी सर्व सोयी सुविधा असल्याचे सांगण्यात येते. परंतू फायर ऑडिटबाबत मात्र माहिती दिली जात नाही.

एकलव्य रेसिडेन्शियल स्कूलमध्ये चांगल्या प्रकारे सुविधा आहेत. याठिकाणी ऑक्सिजन बेडही होणार आहेत. शहादा येथेही ऑक्सिजन बेड वाढवले जात आहेत. या इमारती ह्या सुरक्षित आहेत.

-डाॅ. एन.डी.बोडके, जिल्हा आरोग्य अधिकारी, नंदुरबार.