लसीकरणाच्या ऑनलाइन नोंदणीबाबतही अनेक अडचणी; १८ वर्षांपुढील व्यक्तींचे लसीकरण

कोरोनाच्या दुसऱ्या लाटेमध्ये सर्वात जास्त प्रभाव तरुणवर्गामध्ये दिसून येत आहे. लहान मुलांपासून ते वृद्ध माणसांपर्यंत सगळ्याच व्यक्तींमध्ये कोरोनाची ही दुसरी लाट मोठ्या प्रमाणावर दिसत असल्याने केंद्र सरकारने १८ वर्षांपुढील व्यक्तींचेही लवकरात लवकर लसीकरण करण्यासंबंधी सूचना राज्य शासनाला दिल्या होत्या. त्यानुसार महाराष्ट्र शासनाने १ मेपासून १८ वर्षांपुढील व्यक्तींचे लसीकरण करण्यास सुरुवात केली असली तरी प्रत्यक्षात शहादा तालुक्यातील जयनगरसह अनेक गावांमध्ये १८ वर्षांपुढील व्यक्तींचे लसीकरण होत नाहीये. लसीकरण केंद्रावर गेल्यावर ४५ वर्षांच्या पुढील व्यक्तींनाच प्राधान्य मिळत असून, १८ वर्षांपुढील व्यक्तींचे आरोग्य कर्मचाऱ्यांकडून लसीकरण तर होत नाहीये. शिवाय त्यांचे केव्हा लसीकरण होईल, याबाबतही ठोस उत्तर तरुणांना भेटत नाहीये.

सोशल मीडियाचा उपयोग करण्यात तरुणवर्ग तरबेज असून, ऑनलाइन नोंदणी करून जिल्ह्यात जिथे १८ वर्षाच्या पुढील व्यक्तींचे लसीकरण केंद्र असेल, तिथे जाऊन आपणही लसीकरण करून घ्यावे, यानुसार तरुणवर्ग ऑनलाइन नोंदणी करण्यासाठी प्रयत्न करतात. मात्र प्रत्यक्षात ऑनलाइन नोंदणी होत नसून प्रत्येक वेळी बुकिंग फुल्ल असेच दिसत असते. स्पॉट रजिस्ट्रेशन बंद करण्यात आल्याने लोकांना ऑनलाइन नोंदणी करण्याबाबत अनेक अडचणी निर्माण होत आहेत. महत्त्वाचे म्हणजे ऑनलाइन स्लॉट कधी ओपन होतो आणि कधी पूर्ण होतो हेच कळत नाही. ऑनलाइन स्लॉट ओपन होऊन १० ते १२ मिनिटांत बुकिंग फुल्ल होते. त्यामुळे नेमके बुकिंग कधी करावे हेच समजत नाहीये.

याचा फटका ज्यांनी ऑनलाइन नोंदणी केली नाही, त्यांना लसीकरण करण्यात खूप अडचणी येत आहेत. जिल्ह्यासह संपूर्ण महाराष्ट्रात हीच समस्या येत आहे. यामुळे अनेक लसीकरण केंद्रावर तणावाचे वातावरण दिसून येत आहे. अशा लसीकरणासंदर्भातील नोंदणीच्या समस्या सोडविण्यासाठी ऑनलाइन स्लॉट केव्हा ओपन होतो, ऑनलाइन आणि ऑफलाइनचे बूथ वेगळे ठेवणे तसेच १८ वर्षांपुढील व्यक्तींचेही लसीकरण लवकरात लवकर सुरू करायला हवे, अशी मागणी जयनगरसह परिसरातील गावांमधील तरुणवर्गाकडून होत आहे.