आदिवासी प्रकल्प कार्यालयांना रेमडेसिविरसाठी दहा लाखांचा निधी

नंदुरबार : अनुसूचित जमातीच्या रुग्णास रेमडेसिविर इंजेक्शन उपलब्ध व्हावे यासाठी राज्यातील प्रत्येक आदिवासी प्रकल्प कार्यालयांना प्रत्येकी दहा लाख रुपये न्युक्लीअस बजेटमधून निधी खर्च करण्यास मान्यता देण्यात आल्याची माहिती आदिवासी विकास के.सी.पाडवी यांनी दिली.

पालकमंत्री तथा आदिवासी विकास मंत्री के.सी.पाडवी यांनी जिल्हाधिकारी व संबंधित अधिकाऱ्यांशी ऑनलाईन बैठक घेतली त्यावेळी ते बोलत होते. त्यांनी सांगितले, खासगी रुग्णालयात कोरोना आजारामुळे दाखल झालेल्या अनुसूचित जमातीच्या रुग्णास रेमडेसिविर इंजेक्शनवर येणारा खर्च भागविण्यासाठी प्रत्येक प्रकल्प अधिकारी एकात्मिक आदिवासी विकास विभाग यांना न्युक्लिअस बजेटमधून १० लाख रुपयांपर्यंत निधी खर्च करण्यास मान्यता देण्याचा निर्णय घेण्यात आल्याची माहिती ॲड. पाडवी यांनी दिली.

रुग्णाचे उत्पन्न आठ लाखांपर्यंत असावे. खासगी रुग्णालय महात्मा जोतिबा फुले जनआरोग्य योजनेअंतर्गत नोंदणीकृत नसावे. आदिम जमाती, विधवा, परित्यक्ता निराधार महिला, अपंग, दारिद्र्यरेषेखालील रुग्णांचा प्राधान्याने विचार करण्यात यावा, अशा सूचना देण्यात आल्या असल्याचे त्यांनी सांगितले. आदिवासी बांधवांना उपचारासाठी निधीची कमतरता भासू देणार नाही. कोविडविषयक उपाययोजनांसाठी आदिवासी विभागातर्फे १७२ कोटी रुपये देण्यात आले आहेत, असेही ते म्हणाले.

आरोग्य संचालक डॉ. तात्याराव लहाने यांच्याशी दूरध्वनीवरून चर्चा केली असून एमडी डॉक्टर देण्याविषयी येत्या २१ तारखेला आदेश निर्गमित करण्यात येणार आहेत. अन्न व औषध प्रशासन मंत्री राजेंद्र शिंगणे यांच्याशी दूरध्वनीवरून संपर्क साधून त्यांना जिल्ह्याला अधिक प्रमाणात रेमडेसिविर इंजेक्शन देण्याबाबत विनंती केली असल्याची माहितीदेखील ॲड. पाडवी यांनी दिली.

डॉ. भारूड म्हणाले, कोरोनाविषयक माहिती देण्यासाठी संकेतस्थळाची निर्मिती करण्यात आली आहे. ग्रामीण भागात लसीकरण मोहिमेला वेग देण्यात येत आहे. शहादा येथील ऑक्सिजन सुविधा असलेल्या कोविड सेंटरचे काम पूर्ण झाले असून ते क्रियान्वित होत आहे. तळोदा येथेदेखील ऑक्सिजन खाटांची संख्या वाढविण्याचे नियोजन करण्यात येत आहे. प्रशासनातर्फे ग्रामीण भागातील लसीकरण मोहिमेला वेग देण्यात आला आहे. प्रत्येक पंचायत समितीला दोन वाहनांची सोय करत ग्रामीण भागात लसीकरण शिबिरांचे आयोजन करण्यात येणार आहे.

ग्रामीण भागातील अलगीकरण कक्षात ४५० कोरोनाबाधित व्यक्ती दाखल झाले आहेत. या अलगीकरण केंद्रात आरोग्य कर्मचाऱ्यांची नियुक्ती करण्यात आली आहे. लक्षणे आढळलेल्या बाधित व्यक्तींना कोविड रुग्णालयात संदर्भित करण्यात येत आहे. मोठ्या गावांत लसीकरणासाठी शिबिरांचे आयोजन होत आहे, अशी माहिती गावडे यांनी दिली.