कैरी विक्री व फोडी करून देण्यात तात्पुरता रोजगार उपलब्ध

पावसाळा सुरू झाल्यावर ग्रामीण भागासह शहरी भागात लोणचे तयार करण्यासाठी महिलांची लगबग सुरू होते. बहुतांश शेतकरी, शेतमजुरांच्या जेवणात लोणचे अत्यावश्यक असते. जून व जुलै महिन्यात महिलांची लोणचे टाकण्याची लगबग सुरू असते. लोणचे टाकण्यासाठी विशेष जातीच्या कैऱ्यांची गरज असते. शहादा येथील मार्केटमध्ये किरकोळ दराने ५० ते ५५ रुपयांपर्यंत किलोने लोणच्यासाठी कैरी विक्री होत आहे.

आधी कैऱ्या घेतल्यानंतर लोखंडी सुराच्या साहाय्याने घरी त्याच्या फोडी केल्या जायच्या. मात्र, आता तसे न करता कैऱ्या विक्रीच्या ठिकाणी कैऱ्या फोडणारे उपलब्ध झाले आहेत. १० रुपये किलो दराने कैऱ्या फोडून मिळत आहेत. यामुळे ग्राहक तेथेच कैरीच्या फोड्या करताना दिसून येत आहेत. कैरी विक्रीसोबत कैरी फोडणाऱ्या तरुणांना तात्पुरत्या स्वरूपात रोजगार उपलब्ध होत आहे. याशिवाय लोणच्यासाठी लागणारा मसाला यात मेथी, लवंग, शुद्ध गोडेतेल आदींच्या किमती वाढल्या असल्याने शेतकरी-शेतमजुरांना आर्थिक झळ बसत आहे.