तळोदा शहर आणखी तीन दिवस बंद

लोकमत न्यूज नेटवर्क
तळोदा : कोरोनाबाधितांची संख्या वाढत असल्याने तळोदा शहर तीन दिवस बंद ठेवण्याचे आदेश प्रांताधिकारी यांनी गुरुवारी काढले आहेत़ बाधितांच्या संपर्कात आलेल्या ३९ जणांना क्वारंटाईन करण्यात आले असून गुरुवारी आणखी दोन रुग्ण आढळून आल्यानंतर त्यांच्या संपर्कांचा शोध सुरु झाला आहे़
शहरातील वाढत्या कोरोना रुग्णाच्या पार्श्वभूमीवर त्याचा प्रादुर्भाव रोखण्यासाठी उपविभागीय अधिकाऱ्यांनी तळोदा शहर शुक्रवारपासून तीन दिवस बंद ठेवण्यात आदेश दिले आहेत़ दरम्यान खान्देशी गल्ली व भोई गल्ली या दोन ठिकाणी कंटेन्मेंट झोन घोषित करण्यात आला आहे़ बुधवारी पाच रुग्ण आढळून आल्याने त्याच्या संपर्कात आलेल्या ३९ जणांना आमलाड येथे क्वारंटाईन करण्यात आले आहे़ यातील ५ जणांना स्वॅब देण्यासाठी जिल्हा रुग्णालयात पाठवण्यात आल्याचे आरोग्य विभागाने म्हटले आहे़ दरम्यान गुरुवारी मिरा कॉलनीतील आणखी दोघे पॉझिटिव्ह असल्याची माहिती मिळाल्यानंतर एकच खळबळ उडाली आहे़
तळोदा शहरात कोरोनाचा संसर्ग थांबता थांबत नसल्याचे चित्र आहे़ बुधवारी देखील मोठा माळीवाडा, खान्देशी गल्ली व भोई गल्ली या तीन ठिकाणी कोरोनाचे पाच रुग्ण आढळून आले आहेत़ हे सर्व जण मयत वृद्ध महिलेच्या संपर्कातील असल्याचे सांगण्यात आले आहे़ शहरातील कोरोना बाधितांची संख्या लक्षात घेऊन उपविभागीय अधिकारी अविशांत पांडा तळोदा शहर तीन दिवस बंद ठेवण्याचे आदेश दिले आहेत़ शुक्रवार ते रविवार मध्यरात्रीपर्यंत बंद ठेवण्यात येणार आहे़ या बंद मधून अत्यावश्यक सेवा वगळण्यात आल्या आहेत़ त्याचबरोबर शहरातील ज्यात ठिकाणी हे पाच कोरोना रुग्ण आढळून आले आहेत़ ते खान्देशी गल्ली व भोई गल्ली हे कंटेन्मेंट झोन घोषित आहेत़
बुधवारी रात्रीच आरोग्य यंत्रणेने या भागातील प्रत्येक कुटूंबातील सदस्यांची आरोग्य तपासणी हाती घेतली आहे़

तळोद्यात दोन नव्या कंटेन्मेंट झोनमध्ये आतापर्यंत २०० च्या जवळपास नागरिकांची तपासणी पूर्ण करण्यात आल्याची माहिती आहे़ या भागातून क्वारंटाईन करण्यात आलेल्या ३९ जणांना आमलाड येथे दाखल करण्यात आले आहे़ यातील पाच जणांच्या स्वॅब रिपोर्टकडे नागरिकांचे लक्ष लागून आहे़
दोन्ही नव्या झोनमध्ये पालिका कर्मचाऱ्यांनी निर्जंतुकीकरण करण्याची प्रक्रिया पूर्ण केली आहे़
मीरा कॉलनी येथे गुरुवारी आढळून आलेल्या दोघा बाधितांनी खाजगी रुग्णालयात कोरोना टेस्टींग केल्याची माहिती देण्यात आली आहे़ कोरोनामुक्त असलेल्या तळोदा शहरता रुग्ण वाढत असल्याने नागरिक चिंतेत आहेत़