तळोद्यात विजेच्या लपंडावाने त्रस्त

बाधितांचे व्यायामवर्ग

नंदुरबार : जिल्ह्यातील ९ कोविड केअर सेंटर्समध्ये रुग्ण बरे होण्याचे प्रमाण वाढले आहे. यातून इतर रुग्णांमध्ये आत्मविश्वास वाढला आहे. दाखल असलेल्या रुग्णांना हसत-खेळत ठेवण्यासाठी त्या-त्या ठिकाणी उपक्रम राबवण्यात येत आहेत. यांतर्गत सकाळी योगासन व व्यायाम वर्ग घेतले जात आहेत.

शहादा तालुक्यातील समस्या सोडवा

सारंगखेडा : शहादा तालुक्यातील सारंगखेडा परिसरातील गावांमध्ये मूलभूत सुविधांचा बोजवारा उडाला असल्याचे चित्र आहे. या गावांमध्ये गटारी नसल्याने सांडपाणी गटारींऐवजी रस्त्यांवर आल्याने साथरोगांची लागण होण्याची शक्यता आहे. तालुका प्रशासनाने कोरोनासोबतच इतर किरकोळ बाबींकडे गांभीर्याने लक्ष देण्याची मागणी आहे. याबाबत परिसरातील गावांमधून पाठपुरावाही करण्यात आला होता.

शेतकऱ्यांची लगबग

नंदुरबार : तालुक्याच्या विविध भागात मंगळवारी सकाळी व रात्री पावसाच्या सरी कोसळल्या होत्या. यानंतर शेतकरी शेताकडे धावले होते. येत्या काळात पुन्हा पावसाची शक्यता असल्याने शेतीकामे तसेच शेतात ठेवलेला शेतमाल घराकडे नेण्याची लगबग बुधवारी शेतशिवारात दिसून येत होती.

हळदाणी शेतीकामांना गती

हळदाणी : नवापूर तालुक्यातील हळदाणीसह परिसरात शेतीकामांना गती देण्यात आली आहे. या भागात सध्या खरीप पेरणीची तयारी सुरु आहे. नुकत्याच आटोपलेल्या रब्बी हंगामात या भागात रब्बी मूग, कांदा, भुईमूग या पिकांची लागवड करण्यात आली होती. त्यांची काढणी पूर्ण झाली असल्याने खरिपाच्या तयारीला शेतकरी लागले आहेत. ढगाळ वातावरणामुळे येथील कामांवर दोन दिवस परिणाम झाला होता.

आंबा आवक वाढली

नंदुरबार : शहरातील बाजारपेठेत आंबा आवक दिवसेंदिवस वाढत आहे. लाॅकडाऊनमुळे त्याची विक्री करणे शक्य होत नसल्याने व्यापारी आणि विक्रेते यांचे नुकसान होत आहे. दुपारी एक वाजेपर्यंतच्या वेळेत मिळेल तेवढा माल विक्री करण्याचे उद्दिष्ट ठेवत विक्रेते शहरात फिरत आहेत.

दुर्गम भागात जागृती

धडगाव : तालुक्याच्या दुर्गम भागात प्रशासनासोबत स्थानिक युवक विविध माध्यमांतून जनजागृती करू लागले आहेत. यातून काेरोनापासून बचाव करण्याच्या उपाययोजना आणि लसीकरण वाढीची माहिती दिली जात आहे. युवकांकडून स्थानिक भाषेत संवाद साधला जात असल्याने अडचणी दूर होत आहेत.

बंधारा स्वच्छतेला गती द्यावी

नंदुरबार : तालुक्यातील खामगाव फाट्याजवळ शिवण नदीच्या बंधाऱ्यात पाणी अडवण्यात येते. या पाण्याचा उपयोग शेतकरी शेती व पशुपालक हे गुरांसाठी करतात. परंतु गेल्या काही वर्षात हा बंधारा पूर्णपणे अस्वच्छ झाल्याचे दिसून आले आहे. शेवाळ आणि नागरिकांकडून टाकले जाणारे निर्माल्य यामुळे बंधा-याच कचरा साचत आहे. यामुळे डासांची उत्पत्ती होवून ग्रामस्थांनाही त्रासदायक ठरत आहे.

भाजीपाला आवक

नंदुरबार : बाजार समितीत भाजीपाला आवक वाढल्याने किरकोळ बाजारात त्यांच्या दरात घसरण झाली आहे. शहरातील विविध भागात दुपारी एकपर्यंत भरणाऱ्या बाजारात मेथी, फ्लाॅवर, पालक, कोथिंबिर अत्यंत अल्प दरात विक्री होत आहे. उन्हाळा असतानाही या भाज्यांचे दर कमी आहेत.

टरबूज आवक घटली

नंदुरबार : जिल्ह्यात यंदा तीन हजार हेक्टरपेक्षा अधिक क्षेत्रात टरबुजाची लागवड केली गेली होती. यातून दोन महिन्यांपासून बाजारात टरबुजाची आवक वाढली होती. दरम्यान, तीन दिवसांपासूनचे ढगाळ वातावरण आणि रिपरीप पाऊस यामुळे उत्पादन काहीअंशी खराब झाल्याने बाजारात टरबूज आवक कमी झाली.