गुजरात हद्दीजवळील कारेघाट जंगलातून ११ लाखांचा दारूचा साठा जप्त

नवापूर : गुजरात अवैध विक्रीसाठी नेण्यात येणारा ११ लाख रुपयांचा दारूसाठा नवापूर पोलिसांनी मंगळवारी दुपारी जप्त केला. कारेघाट जंगलाचा आधार घेत नवापूर ते लक्कडकोट मार्गाने ही दारू गुजरात राज्यात पोहोचवली जात होती. जिल्ह्यासह नवापूर तालुक्यात संचारबंदी काळात दारू, गुटखा वाहतुकीवर पोलिसांकडून कारवाई सुरू झाल्याने अवैध व्यवसाय करणाऱ्यांचे धाबे दणाणले आहेत.

पोलीस सूत्रांनुसार, मंगळवारी दुपारी दीड वाजेच्या सुमारास नवापूर तालुक्यातील कारेघाट जंगलातून गुजरात राज्यात एक लाल रंगाचा टेम्पो दारू घेऊन जात असल्याची गुप्त माहिती मिळाल्याने नवापूर पोलिसांचे पथक सतर्क झाले होते. यानुसार त्यांनी जंगलात गस्त सुरू केली असता, एम.एच ३९ ए बी ०८८३ हा टेम्पो दिसून आला. दरम्यान, चालकाला थांबण्याची सूचना करून तो न थांबल्याने पथकाने वाहनाचा पाठलाग करत कारेघाट गावाजवळील जंगलात हा टेम्पो ताब्यात घेतला. यात टेम्पोतून ११ लाख ७ हजार ४२० रुपयांची देशी-विदेशी दारू आणि बीअर मिळून आली. ११ लाख रुपयांचा मद्यसाठा आणि आठ लाखांचा टेम्पो असा एकूण १९ लाख ७ हजार ४२० रुपयांचा मुद्देमाल जप्त करण्यात आला आहे. हा टेम्पो कारेघाट जंगलातून नवापूर पोलीस ठाण्यात आणून टेम्पोमधील दारू पोलीस ठाण्यात जमा करण्यात आली. ही कारवाई नवापूर पोलीस ठाण्यातील पोलीस निरीक्षक बाळासाहेब भापकर, पोलीस उपनिरीक्षक नासीर पठाण, गुमानसिंग पाडवी, प्रवीण मोरे, आदींनी केली आहे. यासंदर्भात दोन संशयित आरोपींना नवापूर पोलिसांनी ताब्यात घेतले आहे. याबाबत नवापूर पोलीस ठाण्यात गुन्हा दाखल करण्याचे काम रात्री उशिरापर्यंत सुरू होते. दरम्यान, नवापूर शहरातून गुजरात राज्यात मोठ्या प्रमाणात दारू तस्करी होत असल्याने राज्य उत्पादन शुल्क विभागाने बारकाईने लक्ष देणे गरजेचे आहे.

हा मद्यसाठा नेमका कोणाचा, कोठून कोठे चालला होता याचा शोध पोलीस घेत आहेत. पोलिसांकडून दोघा संशयितांची कसून चाैकशी झाल्यानंतरच दारू वाहतुकीत गुंतलेल्या तस्करांची नावे समोर येणार आहेत.