रेमडेसिवीरच्या अनियमिततेबाबत कारवाईसाठी पथक

अधिष्ठाता शासकीय वैद्यकीय महाविद्यालय यांनी केंद्रीय आरोग्य मंत्रालय भारत सरकार आणि आयसीएमआरने कोविड १९ बाधित रुग्णांवर उपचारासाठी सुनिश्चित केलेल्या कार्यप्रणालीनुसार, रेमडेसिवीरचा वापर होत असल्याबाबत पथकामार्फत तपासणी करावी. जिल्ह्यातील सर्व रुग्णालयांनी या कार्यप्रणालीनुसार आवश्यक असलेल्या रेमडेसिवीर या औषधाच्या मात्राबाबत मागणी वितरक व सहा.आयुक्त अन्न व औषध प्रशासन यांच्याकडे नोंदवावी. सहा.आयुक्त अन्न व औषध प्रशासन विभाग यांनी मागणीनुसार व रुग्णालयात असलेल्या गंभीर रुग्णांच्या संख्येनुसार खासगी रुग्णालयांना संबंधित मेडिकल दुकानामार्फत पुरवठा करावा.

रेमडेसिवीर हे औषध परस्पर नातेवाइकांना देण्यात येऊ नये. याबाबतचे उल्लंघन झाल्यास संबंधित व्यक्ती किंवा आस्थापनेविरोधात कडक कारवाई करण्यात येऊन परवाना निलंबित करण्यात येईल.

सहा.आयुक्तांनी रुग्णालयात पुरविण्यात आलेल्या मात्रा व वापर करण्यात आलेल्या मात्रांचा ताळमेळ घ्यावा व अनियमितता आढळल्यास संबंधितावर कारवाई करावी. सर्व रुग्णालयांनी वापरण्यात आलेल्या रेमडेसिवीरच्या रिकाम्या बाटल्या पारदर्शक पिशवीत तालुका आरोग्य अधिकारी यांच्याकडे जमा कराव्यात. बॅगेवर रुग्णालयाचे नाव, रुग्णाला पुरविण्यात आलेल्या मात्रांची संख्या, वापरण्यात आलेल्या मात्रांची संख्या, बॅगेतील रिकाम्या बाटल्यांची संख्या आदी तपशील असावा. रिकाम्या बाटल्यांचा अहवाल सहा.आयुक्त अन्न व औषध प्रशासन यांच्याकडे सादर करण्यात यावा. रिकाम्या बाटल्याद्वारे विषाणूचा प्रसार होणार नाही, याची सर्व आस्थापनांनी दक्षता घ्यावी व त्यासाठी मेडिकल वेस्ट डिस्पोजल नियमानुसार कारवाई करावी.

नागरिकांनी कोरोनाचा संसर्ग झाल्यास घाबरून न जाता तज्ज्ञाकडून उपचार घ्यावेत व इतरांपासून स्वत:स अलग करावे. सरसकट तज्ज्ञाकडे आवश्यक नसलेल्या औषधाची मागणी करू नये. रुग्णाच्या स्थितीनुसार औषधाची मात्रा निश्चित करण्यात येत असते. रेमडेसिवीरबाबत कोणीही अफवा पसरवू नये व अफवांवर विश्वास ठेवू नये. अफवा पसरविणाऱ्या व्यक्तीवर दंडात्मक व फौजदारी कारवाई करण्यात येईल, असे आदेशात नमूद करण्यात आले आहे.