रक्तदान शिबिरांमध्ये नोंदणीसाठी उत्स्फूर्त प्रतिसाद

नंदुरबार : ज्येष्ठ स्वातंत्र्य सेनानी स्व.जवाहरलालजी दर्डा उपाख्य बाबूजी यांच्या जयंतीदिनानिमित्त २ जुलैपासून ‘लोकमत’ने आयोजित रक्तदान शिबिरात नोंदणीसाठी रक्तदात्यांचा उत्स्फूर्त प्रतिसाद मिळत आहे. दरम्यान, शुक्रवारी नंदुरबार व बामखेडा, ता.शहादा येथे शिबिरांना सुरुवात होत आहे.

कोरोनामुळे गेल्या सव्वा वर्षांपासून रक्तदान शिबिरे व सार्वजनिक कार्यक्रमांना मर्यादा आल्याने राज्यात सर्वत्र रक्ताचा तुटवडा जाणवत आहे. नंदुरबार जिल्ह्यातही त्याचा मोठा फटका बसला असून सद्य:स्थितीत केवळ दोन दिवस पुरेल एवढाच रक्तसाठा शिल्लक आहे. या पार्श्वभूमीवर ‘लोकमत’ने रक्तदान शिबिरांचे मोठ्या प्रमाणावर आयोजन केले आहे. नंदुरबार जिल्ह्यात २ जुलै ते३० जुलै दरम्यान विविध ठिकाणी सुमारे २० शिबिरे घेण्यात येणार आहेत. त्याची सुरुवात नंदुरबार व बामखेडा येथून होत आहे. नंदुरबार येथे लोकमान्य टिळक जिल्हा वाचनालयाच्या सभागृहात सकाळी १० वाजेपासून या शिबिराला सुरुवात होईल. यावेळी खासदार डॅा.हीना गावीत व आमदार डॅा.विजयकुमार गावीत हे उपस्थित राहणार आहेत. त्यासाठी जनकल्याण रक्तसंस्था व नंदुरबार जिल्हा रुग्णालयातील रक्तसंस्थांचे सहकार्य लाभणार आहे. या शिबिरासाठी विविध संघटनांचाही सहभाग लाभणार आहे.

बामखेडा, ता.शहादा येथील विविध शहर व ग्राम लेवा पाटीदार ग्लोबल गुजर मंडळाच्या सहकार्याने शिबिर होत असून त्यासाठी नवजीवन रक्त संस्थेचे सहकार्य लाभले आहे. येथील एकता चौकात सकाळी आठ वाजता शिबिराला सुरुवात होईल. यावेळी सरपंच मनोज चौधरी व पोलीस पाटील योगेश चौधरी उपस्थित राहणार आहेत.

नंदुरबार व बामखेडा या दोन्ही ठिकाणी रक्तदान करण्यासाठी दात्यांनी नोंदणीला उत्स्फूर्त प्रतिसाद दिला आहे. या शिबिरात जिल्ह्यातील विविध संघटना सहभागी होणार आहेत. त्यात नवनिर्माण संस्था, नंदनगरी रोटरी क्लब ऑफ नंदुरबार, लायन्स क्लब ऑफ नंदुरबार, नंदुरबार जिल्हा मुख्याध्यापक संघ, प्राथमिक शिक्षक परिषद नंदुरबार तसेच एनसीसीचे विद्यार्थी, वंचित बहुजन आघाडी आणि विविध शहर व ग्रामलेवा पाटीदार ग्लोबल मंडळ अर्थात व्हीएसजीजीएम या संस्थांसह विविध संघटनांचा सहभाग राहणार आहे. हे शिबिरे दोन जुलैपासून तर ३० जुलैपर्यंत सुरू राहणार आहेत. ग्रामीण भागासह नवापूर, तळोदा आणि शहादा या शहरातही रक्तदान शिबिरांचे नियोजन करण्यात आले आहे.