कोरोना रुग्णांसाठी विशेष रेल्वे

नंदुरबार : केंद्रीय रेल्वे व आरोग्य विभागाच्या वतीने जास्त रुग्ण असलेल्या जिल्ह्यांमध्ये उपचारासाठी रेल्वे कोविड कोच पाठविण्यात येत आहे. त्यानुसार खासदार डॉ.हीना गावित यांनी केंद्रीय आरोग्य मंत्री व केंद्रीय रेल्वेमंत्र्यांकडे रेल्वे कोच उपलब्ध करून देण्याची विनंती केली होती. या पाठपुराव्याला यश आले आहे. नंदुरबार येथील रेल्वे स्थानकावर ११ रोजी रेल्वे कोविड कोच दाखल झाला आहे. १२ एप्रिलपासून रुग्णांवर उपचारासाठी हे कोच उपलब्ध होणार असल्याची माहिती खासदार डॉ.हीना गावित यांनी दिली.

गतवर्षी देशासह राज्यात व जिल्ह्यात कोरोनाने शिरकाव केला होता. वाढता प्रादुर्भाव घेता केंद्रीय आरोग्य मंत्री व केंद्रीय रेल्वेमंत्री यांनी कोरोना बाधित रुग्णांच्या उपचारासाठी रेल्वे कोविड कोच वर्षभरापूर्वी तयार केल्या होत्या. या रेल्वे कोविड कोच ज्या जिल्ह्यांमध्ये कोरोनाचे जास्त रुग्ण आहेत व तेथे वैद्यकीय सुविधा पुरविणे गरजेचे आहे, अशा ठिकाणी पाठविण्यात येत आहे. नंदुरबार जिल्ह्यात कोरोनाच्या दुसऱ्या लाटेमुळे मोठ्या प्रमाणात कोरोना रुग्ण आढळून येत आहेत. ही गंभीर परिस्थिती पाहता रुग्णांच्या उपचारासाठी खासदार डॉ.गावीत यांनी केंद्रीय आरोग्य मंत्री डॉ. हर्षवर्धन आणि रेल्वेमंत्री पीयूष गोयल यांच्याशी चर्चा करून नंदुरबार जिल्ह्यासाठी कोविड रेल्वे कोच उपचाराकरिता उपलब्ध व्हावी, असा पाठपुरावा केला होता. अखेर या पाठपुराव्याला यश आले आहे. ११ रोजी नंदुरबार येथील रेल्वेस्थानकाच्या प्लार्टफार्म क्रमांक तीन याठिकाणी रेल्वेची कोविड कोच उपलब्ध झाले. या कोविड रेल्वेमध्ये २० डबे असून एका कोचमध्ये १६ ते २४ बेड असतील. असे एकूण ३२० बेड आहेत.

मच्छरदानीसह बाथरूम व दोन बायोटॉयलेटची व्यवस्था करण्यात आली आहे. तसेच एका कोचमध्ये दोन ऑक्सिजन व कूलरची व्यवस्था असणार आहे. कोचमध्ये तीनशे ते चारशे रुग्ण कमी लक्षणे सदृश्य असल्यास त्यांच्यावर उपचार करण्यात येईल.

या रेल्वे कोचमध्ये नंदुरबार जिल्हा प्रशासन व आरोग्य विभागामार्फत रुग्णांवर उपचार करण्यात येतील. तसेच या कोचच्या सुरक्षेची जबाबदारी रेल्वे प्रशासनाची असणार आहे. १२ एप्रिलपासून रुग्णांच्या उपचारासाठी उपलब्ध होणार असल्याची माहिती खासदार गावीत यांनी दिली.