धार्मिक स्थळांमध्ये शुकशुकाट, नित्य पूजाअर्चा मात्र सुरू

नंदुरबार : कोरोना काळात जिल्ह्यातील सर्व धार्मिक स्थळे बंद आहेत. यामुळे बंद दाराआडच पुजारी नित्य पूजाअर्चा करत आहेत. काही ठिकाणी भाविकांना बाहेरूनच देवाच्या मूर्तीचे मुखदर्शन व्हावे, यासाठी सोय करण्यात आली आहे. जिल्ह्यात संपूर्ण संचारबंदी लागू झाल्यानंतर धार्मिक स्थळेही बंद करण्यात आली. नंदुरबारमधील गणेश मंदिर व दंडपाणेश्वर मंदिर, जयनगर (ता. शहादा) येथील हेरंब गणेश मंदिर, प्रकाशा येथील केदारेश्वर व पुष्पदंतेश्वर महादेव मंदिर, तळोदा येथील कालिका माता मंदिर या काही प्रमुख मंदिरांमध्ये सध्या शुकशुकाट आहे. या मंदिरांचे दरवाजे भाविकांसाठी बंद करण्यात आले आहेत. केवळ पुजारी त्या ठिकाणी सकाळ, दुपार व सायंकाळी नियमित पूजा करत आहेत. काही मंदिरांच्या विश्वस्तांनी भाविकांना बाहेरूनच मूर्तीचे दर्शन व्हावे, यासाठी सोय केली आहे. परंतु, हे करताना मंदिर परिसरात गर्दी होणार नाही, याचीही काळजी घेतली जात आहे. नंदुरबारमधील काही मंदिरांबाहेर पोलीस बंदोबस्तही तैनात करण्यात आला आहे.

मुस्लिम बांधवांचे रोजे सुरू असल्याने नमाज अदा करण्यासाठी मशिदींमध्ये गर्दी होणार नाही, याचीही काळजी स्थानिक प्रशासन घेत आहे.