ऑलिम्पिक गोफ साकारून श्रॉफ हायस्कूलने भारतीय खेळाडूंना दिल्या शुभेच्छा

२०२० मध्ये आयोजित करण्यात आलेला ऑलम्पिक खेळ महोत्सव कोरोनाच्या पार्श्वभूमीवर पुढे ढकलण्यात आला होता. जपानमध्ये आता पुन्हा या खेळ स्पर्धांचे आयोजन करण्यात आले आहे. ऑलिम्पिकमध्ये २७० खेळाडूंचा भला मोठा भारतीय संघ जपानमध्ये दाखल झाला आहे.

या संघात १० खेळाडू महाराष्ट्र राज्यातील आहेत. देशाचे नाव उज्ज्वल व्हावे, खेळाडूंना आपले कौशल्य दाखवून स्पर्धा जिंकता यावी या हेतूने श्रॉफ हायस्कूलमध्ये शुभेच्छा देण्याचा संकल्प कार्यक्रम आयोजित केला गेला. याप्रसंगी जिल्हा क्रीडा अधिकारी सुनंदा पाटील, मुख्याध्यापिका सुषमा शाह, उपमुख्याध्यापक राजेश शाह, पर्यवेक्षक विद्या सिसोदिया, जगदीश पाटील, क्रीडा प्रमुख दिनेश ओझा, मुकेश बारी यांची प्रमुख उपस्थिती होती.

मोहित सोनार या विद्यार्थ्याने ऑलिम्पिक खेळाचा इतिहास विद्यार्थ्यांना सांगितला तर शिक्षक जावेद धोबी यांनी ऑलिम्पिकमध्ये सहभागी १० महाराष्ट्रीयन खेळाडूंचा परिचय करून दिला. जिल्हा क्रीडा अधिकारी सुनंदा पाटील यांनी देशाच्या खेळाडूंना शुभेच्छा दिल्या. तसेच पॅरा ऑलिम्पिक स्पर्धांमध्येही भारतीय खेळाडू सहभागी झाला असल्याचे त्यांनी स्पष्ट केले.

सूत्रसंचालन सीमा पाटील तर आभार जावेद धोबी यांनी मानले. कार्यक्रमासाठी क्रीडाशिक्षक भिकू त्रिवेदी, जगदीश वंजारी, कलाशिक्षक महेंद्र सोमवंशी, हेमंत पाटील, शिवाजी माळी, किशोर रोंदळ, नरेंद्र सूर्यवंशी, हेमंत लोहार, सुनील राणा आदी शिक्षक व कर्मचाऱ्यांनी परिश्रम घेतले.