प्रकाशा येथे तीन तालुक्यांसाठी विलगीकरणाची सोय

नवापूर येथेही शाळेत किंवा वसतिगृहात ही सोय करण्यात येणार आहे. तसेच एकलव्य रेसिडेन्सी स्कूलमध्ये २७५ रुग्णांसाठी ऑक्सिजन बेड ऑक्सिजन प्लँटसह तर शहादा येथे १०० बेड ऑक्सिजन प्लँटसह व नवापूर येथे सुरुवातीचे २० व आता ५० ऑक्सिजन बेड तयार करण्यात येणार आहे. यासाठी जिल्हा नियोजन समितीतून तीन कोटी रुपये देण्यात येणार असल्याची माहिती त्यांनी दिली.

ते म्हणाले की, कोविड रुग्णांची वाढती संख्या लक्षात घेता त्यांची विलगीकरणाची योग्य ती सोय करून त्यांना त्या ठिकाणी औषधोपचार करण्यात येईल. रेमडेसिवीर इंजेक्शनची ज्याला आवश्यकता असेल त्यानेच ते घ्यावे. कोविड रुग्णासाठी सर्व सोयीनी युक्त असे रेल्वेचे कोचदेखील उपलब्ध करून देण्यात येणार आहेत. तसेच लिक्विड ऑक्सिजन प्लँटसाठी मोठ्या कंपन्यांशी बोलणी सुरू असून ते २० दिवसांत तो प्लँट सुरू करून देण्यास तयार आहेत. तसेच जिल्ह्यात एम.डी. डॉक्टर आणण्यासाठीही प्रयत्न सुरू असल्याचे त्यांनी सांगितले.