जिल्ह्यातील ११ शाळांची आदर्श शाळा म्हणून निवड

आकर्षक शाळा इमारत विद्यार्थीनुसार वर्ग खोल्या मुला-मुलींकरीता स्वतंत्र व पुरेशी स्वच्छता गृहे, पेयजल सुविधा व हँड वॉश स्टेशन मध्यान्ह भोजनाकरीता स्वयंपाकगृह व भांडार कक्ष शैक्षणिक साहित्य खेळाचे साहित्य ग्रंथालय, संगणक कक्ष, व्हर्च्युअल क्लास रूमसह शाळेत विद्युतीकरण सुविधा, शाळेला संरक्षक भिंत, आपत्ती व्यवस्थापनाच्या दृष्टीकोनातून शाळेत अग्निशमन उपायोजनासह आपत्कालीन व्यवस्थेची उपलब्धता, परिसरातील शाळेमध्ये प्रवेशित विद्यार्थ्यांसाठी सुरक्षित वाहतूक व्यवस्था उपलब्ध करणे, उत्कृष्ट शिक्षकांना देशांतर्गत व देशाबाहेरील प्रशिक्षणासाठी पाढविणे. इयत्ता पाचवीच्या विद्यार्थ्यांची स्काॅलरशीप परीक्षेची तयारी करून घेणे आदी सुविधा विकसित करणे अपेक्षित आहे.

या आदर्श शाळांमध्ये वरील सुविधा शासकीय निधी शिवाय सिएसआर फंड व लोकसहभागातून उपलब्ध करून द्याव्यात. तसेच सर्व शासकीय, जिल्हास्तरीय व ग्रामस्तरीय योजनांचे एकत्रिकरण करून सदर शाळा विकसित करण्याचा उपक्रम हाती घेण्यात यावा, अशा सूचना राज्य शासनाने दिल्या आहेत.

नंदुरबार जिल्ह्यातील कस्तुरबा गांधी बालिका स्कूल उमरी,ता अक्कलकुवा, कस्तुरबा गांधी बालिका स्कूल कोराई, ता.अक्कलकुवा, अटल बिहारी वाजपेयी आंतरराष्ट्रीय निवासी शाळा, तोरणमाळ, ता.धडगाव, कस्तुरबा गांधी बालिका स्कूल जुने धडगाव, लोकमान्य टिळक हायस्कूल नंदुरबार, कस्तुरबा गांधी बालिका स्कूल टोकरतलाव नंदुरबार, जि.प. शाळा भादवद, ता. नवापूर, कस्तुरबा गांधी बालिका शाळा वाकीपाडा ता. नवापूर, म्युनिसिपल न्यू इंग्लिश स्कूल शहादा, कस्तुरबा गांधी बालिका स्कूल मोहिदेतर्फे हवेली, ता.शहादा, जि.प. प्राथमिक शाळा पुर्नवसन क्रमांक चार ता. तळोदा, कस्तुरबा गांधी बालिका स्कूल तऱ्हावद, ता.तळोदा अशा ११ शाळांचा समावेश करण्यात आलेला आहे. ११ पैकी सात शाळा या कस्तुरबा गांधी बालिका विद्यालय असून, दोन जिल्हा परिषदेच्या तर एक आंतरराष्ट्रीय निवासी शाळा व शहादा नगरपालिकेच्या शाळेचा समावेश आहे.

स्वातंत्रपूर्व काळात इ.स. १९१३ साली पंडित वकिलांनी म्युनिसिपल न्यू इंग्लिश स्कूल या शाळेची स्थापना केली होती. सध्या ही शाळा नगरपालिकेच्या शिक्षण विभागामार्फत संचालित करण्यात येत आहे. येथे पाचवी ते बारावीपर्यंत शिक्षणाची सोय आहे. सद्य:स्थितीला एकूण एक हजार ५९ विद्यार्थी येथे शिक्षण घेत आहेत. खानदेशातील सर्वाधिक जुनी शाळा म्हणून, या शाळेची नोंद आहे. राजकीय अनावस्था व लोकप्रतिनिधींचे दुर्लक्ष यामुळे या शाळेची तर दुरावस्था झाली असून, इमारतीची भयावह परिस्थिती आहे. अनेक आजी-माजी आमदारांसह शहादाचे नगराध्यक्ष डॉक्टर, इंजिनीअर, वकील व राजकारणात विविध पक्षाचे नेतृत्व करणारे या शाळेचे माजी विद्यार्थी आहेत. स्वातंत्र्यपूर्व काळापासून या शाळेने आपले स्वतंत्र अस्तित्व कायम ठेवले आहे. आता राज्य शासनाने या शाळेला आदर्श शाळा म्हणून घोषित केले असून, वर्षभरात येथे उच्च दर्जेदार शिक्षणासह विविध शैक्षणिक उपक्रम राबविण्यासाठी राज्य शासनासह शहादा नगरपालिका व विविध पक्षाच्या लोकप्रतिनिधींनी योग्य ती खबरदारी घेणे गरजेचे आहे. शाळेचे गतवैभव पुन्हा प्राप्त करण्यासाठी ही सुवर्णसंधी प्राप्त झाली असल्याने एकत्रितपणे आता सामूहिकरीत्या सर्वांची जबाबदारी निश्चितच वाढली आहे