वाळूचा ट्रक नादुरूस्त झाल्याने बायपास रोडवर रहदारी खोळंबली

नंदुरबार शहरातील शहादा बायपास रस्त्यावरील उड्डाणपुलाच्या चढावर निझर रस्त्यावरुन येणारी वाळूने भरलेली मालट्रक (क्र. एमएच २१ एक्स ६३०९) धुळे रस्त्याकडे जात असताना अचानक बिघाड झाल्यामुळे वाहतूक व्यवस्थेचे तीनतेरा वाजले होते. उड्डाणपुलाच्या चढावरच मालट्रक नादुरूस्त झाल्यामुळे काही काळ वाहतूक व्यवस्था कोलमडली होती. जगतापवाडी चौक ते जाणता राजा चौकापर्यंत वाहनांच्या लांबच लांब रांगा लागल्या होत्या. वाहनचालकांनी शहर वाहतूक शाखेला कळविल्यानंतर पोलीस निरीक्षक अविनाश मोरे पथकासह दाखल झाले. यावेळी पथकातील पोलीस कर्मचाऱ्यांनी वाहतूक व्यवस्था सुरळीत करण्यासाठी प्रयत्न केले.

रुग्णवाहिका अडकली

वाळू भरलेल्या मालट्रकमध्ये बिघाड झाल्यामुळे बायपास झालेल्या वाहतुकीच्या खोळंब्यामुळे दोन रुग्णवाहिका १५ ते २० मिनिटे अडकून पडल्या होत्या. रुग्णवाहिका चालकाने वेळोवेळी सायरन वाजल्यानंतर पोलीस निरीक्षक अविनाश मोरे व पथकाने रुग्णवाहिकेला वाट मोकळी करून दिली.