खेतिया फाटा ते म्हसावद रस्त्याची लागली ‘वाट’

खेतिया फाटा ते म्हसावद गावापर्यंत रस्त्यावर मोठमोठे खड्डे पडल्याने अक्षरशः चाळण झाली आहे. दुचाकी वाहने नागमोडी वळणे घेऊन चालवावी लागतात तर चारचाकी वाहन कितीही खड्डे टाळले तरी खड्ड्यात वाहन पडते. वाहनचालकांना तारेवरची कसरत करावी लागत असून पाठीचे, मणक्याचे, मानेचे आजार होऊन दुखणे वाढत आहे. वाहनेही नादुरुस्त होत आहेत. रस्त्याला लागून झाडांच्या फांद्या वाढून रस्त्यावर येत आहेत. परिणामी रस्त्याच्या दोन्ही बाजूच्या साईडपट्ट्या गायब झाल्या आहेत. पाच दिवसापूर्वी खड्डे बुजवण्यात आले. मात्र दोन दिवसातच ‘जैसे थे’ परिस्थिती झाली. हा रस्ता एकप्रकारे संबंधितांसाठी कुरणच ठरले आहे. पाच मीटरचा रस्ता साडेतीन मीटरचा झाला तरी संबंधित विभागाला काहीच देणेघेणे नाही. उसाची वाहने उलटून अपघात होत आहेत. त्यातच नवलपूर, आवगे, फत्तेपूर गावाजवळ गतिरोधक चुकीच्या पध्दतीने टाकण्यात आले आहेत. हाच रस्ता महाराष्ट्रातील दोन नंबरचे थंड हवेचे ठिकाण तोरणमाळ व दुर्गम भागातील धडगावसारख्या तालुक्याला जोडणारा रस्ता असताना तो दुर्लक्षित झाला आहे. आमदार, जिल्हा परिषद व पंचायत समिती सदस्य, सरपंच यांच्यासह संबंधित विभागाच्या अधिकाऱ्यांच्या दुर्लक्षामुळे जनतेतून नाराजी व्यक्त होत आहे.

नवलपूर, पिंपरीच्यापुढे अशोका पेट्रोलियमजवळ तर रस्ता शोधावा लागतो. जुनवणे व नवलपूर फाट्यावरील गतिरोधक ‘असून अडथळा नसून खोळंबा’ असे ठरत आहेत. दोन महिन्यात खड्डे दुरूस्ती तर सोडाच संबंधित विभागाने ढुंकूनही पाहिले नाही. आता बुजवले तेही एक सोडून एक खड्डा बुजवला. नवलपूर फाट्यावरील बाभळीचे झाड वाकून रस्त्यावर आल्याने दुचाकीस्वाराला फांद्यांचा फटका हमखास बसतो. धडगाव, तोरणमाळसारख्या अतिदुर्गम भागाकडे जाणारा एकमेव मुख्य रस्ता असूनही दुर्लक्ष केले जात आहे. या रस्त्याची दुरुस्ती करुन वाहनधारकांना दिलासा द्यावा अन्यथा रस्ता रोको आंदोलनाचा इशारा देण्यात आला आहे.