जनता कर्फ्यूला तळोद्यात प्रतिसाद

नंदुरबार जिल्ह्यात कोरोनाचा उद्रेक झाला असून परिस्थिती नियंत्रणात असावी यासाठी जिल्हाधिकाऱ्यांनी २७ व २८ मार्च रोजी जनता कर्फ्यूचे आवाहन केले होते. कुणीही घराबाहेर पडू नका असे आवाहन प्रशासनाकडून करण्यात आले होते. त्याला शहरातील व्यापाऱ्यांनी आपापली दुकाने बंद ठेवून व बाहेर न पडता या प्रतिसाद दिला. तळोदा येथील नेहमी गजबजलेला व रहदारीचे ठिकाण असलेले मुख्य बाजापेठ, स्मारक चौक, सराफ बाजार, भाजी मंडी, चिनोदा चौफुली, कॉलेज रोड, बिरसा मुंडा चौक, शहादा रोड, बसस्थानक परिसरात शुकशुकाट होता. मोती बँक ते काकशेठ गल्लीपावेतो रस्ते निर्मनुष्य होते. बंदच्या आवाहनाला प्रतिसाद देत नागरिकांनी घरातच बसणे पसंत केले. ठिकठिकाणी पोलीस बंदोबस्त तैनात होता. रस्त्याने जाणाऱ्या व्यक्तीला थांबवून तो कुठे व कशासाठी जात आहे याची चौकशी केली जात होती. ग्रामीण भागातही जनता कर्फ्यूला सकारात्मक प्रतिसाद पाहायला मिळाला.

बसेस बंद

कोरोना विषाणूचा प्रादुर्भाव नियंत्रणात आणण्यासाठी पुकारलेल्या या जनता कर्फ्यूमुळे तळोदा शहरातून जाणाऱ्या बसफेऱ्या रद्द करण्यात आल्या. अक्कलकुवा आगाराकडून सर्व प्रकारच्या बससेवा बंद ठेवण्यात आल्या होत्या. त्यामुळे नियमित गजबजलेले तळोदा शहर बसस्थानक परिसरात केवळ काही बसेस उभ्या होत्या. परिणामी या भागात शुकशुकाट दिसून आला. शनिवारी सर्वच बसेस आगारात उभ्या असून कर्मचारी मुख्यालयात ठाण मांडून पुढील आदेशाची वाट पाहत आहेत.