शहाद्यात दुसऱ्या दिवशीही लॉकडाऊनला प्रतिसाद

शहरासह तालुक्यातील ग्रामीण भागात कोरोना विषाणू संक्रमणाचा फैलाव मोठ्या प्रमाणात होत असल्याने प्रशासनातर्फे १५ एप्रिलपर्यंत दररोज सकाळी सात ते दुपारी एक हा कालावधी वगळता लॉकडाऊन जारी करण्यात आला आहे. लॉकडाऊनच्या दुसऱ्या दिवशी शहरातील नागरिकांनी प्रशासनाच्या आवाहनाला सकारात्मक प्रतिसाद देत दुपारी एक वाजेनंतर कडेकोट बंद पाळला. पोलीस प्रशासनातर्फे चोख बंदोबस्त लावण्यात आला असून नियमांचे उल्लंघन करणाऱ्यांवर कारवाई केली जात आहे.

प्रशासनातर्फे कारवाई केली जात असली तरी सायंकाळच्या सुमारास मोठ्या प्रमाणात मोटारसायकलवर काही हौशी नागरिक शहरात भ्रमण करतात. पोलिसांची गाडी दिसली की लपायचे व पोलीस गाडी गेल्यानंतर पुन्हा शहरात भटकंती करायची, असा प्रकार सुरू आहे. अशा मोटारसायकलस्वारांवर पोलीस प्रशासनाने कठोर कारवाई करावी, अशी मागणी जोर धरत आहे. विशेष म्हणजे लॉकडाऊनच्या कालावधीत अत्यावश्यक सेवा, कृषीविषयक सेवा व शासकीय वाहने वगळता इतरांना पेट्रोलपंप चालकांनी पेट्रोल-डिझेलची विक्री करू नये, असे आदेश जिल्हाधिकाऱ्यांनी दिले असले तरी शहर व परिसरातील पेट्रोल पंपावर सहजरीत्या पेट्रोल-डिझेल मिळत असल्याने याचा गैरफायदा काही नागरिकांकडून घेतला जात आहे. पेट्रोलपंप चालकांनी शासकीय नियमांचे पालन करावे, असे आदेश असले तरी त्याचे उल्लंघन होत असल्याने अशा पेट्रोलपंप चालकांवरही प्रशासनाने कारवाई करण्याची गरज आहे.

लॉकडाऊनच्या कालावधीत प्रत्येक शनिवार व रविवारी प्रशासनाने जनता कर्फ्यू जाहीर केला आहे. या दोन दिवसांत वैद्यकीय प्रतिष्ठान वगळता इतर सर्व व्यापारी प्रतिष्ठाने बंद ठेवण्याचे आदेश प्रशासनातर्फे देण्यात आले आहे. कोरोना विषाणू संक्रमणाची साखळी तोडण्यासाठी हे आवश्यक असल्याने नागरिकांनी प्रशासनाला सहकार्य करून शासकीय नियमांची अंमलबजावणी करावी, असे आवाहन नगरपालिका, पोलीस व महसूल प्रशासनातर्फे करण्यात आले आहे.