ज्येष्ठ नागरिकांच्या बैठकीत विविध मागण्यांचा ठराव

येथील ज्येष्ठ नागरिक सभागृहात आई, वडील व ज्येष्ठ नागरिक कल्याण संस्थेच्या वतीने १५ जून ज्येष्ठ नागरिक छळ प्रतिबंध जागृती दिनानिमित्त ज्येष्ठ नागरिक कायदा साक्षरता शिबिराचे आयोजन करण्यात आले होते.

दिवाणी न्यायाधीश तथा सचिव जिल्हा विधिसेवा प्राधिकरणाचे सचिव सतीश मलिये यांनी ज्येष्ठ नागरिकांना न्यायालयाकडून दिल्या जाणाऱ्या योजना सवलतीविषयी माहिती दिली.

यशवंत स्वर्गे यांनी तरुण पिढीला संस्काराची गरज असल्याचे सांगत, पीडित ज्येष्ठ नागरिक आणि शासनाचे अधिकारी यांच्यात समन्वय साधण्याचे संस्थेचे कार्य कौतुकास्पद असल्याचे ते म्हणाले.

नामदेव शिंदे, आत्माराम चौत्राम इंदवे यांनी मनोगत व्यक्त केले. आपबिती या सदराखाली सुदाम दळवी, प्रमिला नाना पवार, सनतकुमार अनिरुद्ध त्रिवेदी, पद्माकोर राजपूत यांनी आपल्या व्यथा मांडल्या. जिल्हा पेन्शनर संघाचे अध्यक्ष मधुकर रामजी साबळे यांनी एकूण ७ ठराव मांडले. पोलीस निरीक्षक महेश माळी यांना मागण्यांचे निवेदन सादर करण्यात आले. नीलम रवींद्र पाटील हिने कविता सादर केली. ॲड.गोविंदभाई पाटील, हैदरअली नुरानी, वसंत चौधरी, डॉ.पितांबर सरोदे, सय्यद इ.डी. लियाकतअली, मगनभाई पाटील, तिरथदास धनवाली, नगिनदास अग्रवाल, जावेद गमीर धोबी, श्रीकांत पाठक, अशोक टेंभेकर आदी उपस्थित होते.

आनंदा बारका पाटील आणि आत्माराम चौत्राम इंदवे यांनी कार्यक्रम यशस्वितेसाठी लागणारा खर्च आणि परिश्रम घेतले. प्रास्ताविक बारकू नवल पाटील यांनी केले. सूत्रसंचालन गणपत पाटील यांनी केले.

यावेळी पुढील मागण्या करण्यात आल्या. ज्येष्ठ नागरिकांच्या जीवित व मालमत्तेचे संरक्षणाबाबतच्या कायदेशीर तरतुदींची अंमलबजावणी करावी. आई-वडिलांना न सांभाळणाऱ्या मुला-मुलींची यादी जाहीर करावी. ज्येष्ठ नागरिकांना आपत्कालीन परिस्थितीत तातडीने मदत करावी. ज्येष्ठ नागरिक कक्षाचे कामकाज प्रभावीपणे राबविण्यात यावे. पोलीस अधिकारी/कर्मचारी यांना ज्येष्ठ नागरिक कायद्याचे प्रशिक्षण द्यावे. जिल्ह्यात ज्येष्ठ नागरिकांसाठी विशेष पोलीस युनिट तयार करण्यात यावे. पोलीस प्रशासनाने १५ जून ज्येष्ठ नागरिक छळ प्रतिबंध जागृती दिवस पाळावा.