तळोदा उपजिल्हा रुग्णालयात ‘सीवायडीए’मार्फत १५ बेड प्राप्त

कोठार : सामाजिक बांधिलकी जपत पुणे येथील सीवायडीए संस्थेमार्फत तळोदा उपजिल्हा रुग्णालयात १५ बेड प्राप्त झाले आहेत. यामुळे कोरोना रुग्णांना बेड्स उपलब्ध होणार असून उपचार करणे सोयीचे ठरणार आहे.

जिल्ह्यात कोरोनाच्या रुग्णांची संख्या घटत असली तरी प्रशासनाकडील अपुऱ्या सोयी सुविधेमुळे अनेक ठिकाणी रुग्णांना उपचारासाठी बेड्स वेळेत उपलब्ध होत नाहीत. बेड उपलब्ध न होणे, ऑक्सिजन, व्हेंटिलेटरचा अभाव आदींमुळे कोरोना रुग्णांचा मृत्यू होत आहे. अशा संकटांच्या प्रसंगी सामाजिक जबाबदारी म्हणून विविध संघटना पुढाकार घेत आहेत. कोरोना रुग्णांना काही प्रमाणात आधार मिळेल आणि शासकीय यंत्रणांवरील ताणही कमी होईल या भावनेतून नंदुरबार सेंट्रल युथ डेव्हलपमेंट ॲण्ड ॲक्टिव्हिटीज या पुणे येथील संस्थेने पुढाकार घेतला आहे. जिल्ह्यातील विविध भागातील कोविड केअर सेंटरमध्ये या संस्थेच्या माध्यमातून बेड उपलब्ध करून देण्यात येत आहेत.

तळोदा उपजिल्हा रुग्णालयात पुणे येथील सेंट्रल युथ डेव्हलपमेंट ॲण्ड ॲक्टिव्हिटीज या संस्थेमार्फत तळोदा उपजिल्हा रुग्णालयाला १५ बेड्स मंगळवारी उपलब्ध झाले आहेत. तहसीलदार गिरीश वखारे, तालुका वैद्यकीय अधिकारी डॉ.महेंद्र चव्हाण, डॉ. भरत पाटील, वैद्यकीय अधीक्षक डॉ.विजय पाटील व आरोग्य कर्मचाऱ्यांच्या उपस्थितीत हे बेड्स आरोग्य विभागाकडे सुपुर्द करण्यात आले.